MENU

मेसी- द म्यान एट बार्सा

635x90_1

गोविन्द रेग्मी शनिवार, असार ३१, २०७४ 30249 पटक पढिएको

Share This

Annapurna-635-pix-85pix_2

खेल

विश्वचर्चित फुटबल खेलाडीको नाम लिँदा अर्जेन्टिनी राष्ट्रिय टोलीका कप्तान एवं स्पेनिस क्लब बार्सिलोनाका आइकल लियोन मेसीलाई छुटाउने जमात कमै भेटिन्छ । पाँचपटक फिफा वर्ष खेलाडीको ताज पहिरिएका मेसी अहिले चर्चाको शिखरमा छन् । उनै मेसीका नेपालमा समेत लाखौं फ्यान पाइन्छ ।
मेसीका लाखौं नेपाली फ्यानमध्येका प्रतिनिधि पात्र हुन्- पत्रकार किरण मरहठ्ठा । किरण अहिले मेसीको फ्यानमा मात्र सीमित छैनन् । उनले मेसीको क्लब बार्सिलोनामै पुगेर आफ्ना मनपर्ने खेलाडी मेसीको डकुमेन्ट्री बनाउन सफल भए ।

‘म सानैदेखि बार्सिलोनाको फ्यान हुँ । मेसी मलाई असाध्यै मनपर्ने । मलाई उनी यो संसारको सबैभन्दा प्रतिभावान् खेलाडी लाग्छ । त्यस्तो स्टारसँग काम गर्ने चाहना जो कोहीको हुन्छ । मलाई पनि मेसीको बारेमा केही गरेर छाड्ने चाहना भयो । टेलिभिजन पत्रकारिता गरिरहेको मैले मेसीको बारे डकुमेन्ट्री बनाउने सोच राखेँ । यस्तो डकुमेन्ट्री निर्माण गर्न पाए नेपाली फुटबल र पर्यटन प्रवद्र्धनमा समेत योगदान हुनेथियो भन्ने मलाई लागेको थियो', किरणले डकुमेन्ट्री बारेको सोच सुनाए ।

किरणले सन् २०११ मा बार्सिलोना पुग्दा नै डकुमेन्ट्री बनाउने विचार गरेका थिए । तर, उनको त्यहाँ कुनै सम्पर्क थिएन । उनले विभिन्न स्रोतमार्फत क्लबको सञ्चार विभागमा सम्पर्क स्थापित गर्न खोजे । तर, उनीहरूले यो विषयलाई एक कानले सुनेर अर्काे कानले उडाइदिए । ‘पहिलो पटकमा मेरो योजना सफल भएन । तर, म निरन्तर सम्पर्कमा थिएँ र प्रयत्न पनि जारी राखेँ । सन् २०१५ अप्रिलमा उनिहरूले नै मलाई यो डकुमेन्ट्री निर्माणको लागि बोलाए । यसमा मेरो टेलिभिजन करियरकै कारणले सम्भव भएको हो', किरण भन्छन् ।


पत्रकार किरण मरहठ्ठाले क्लब बार्सिलोनामा पुगेर आफ्ना प्रिय खेलाडी आइकल लियोन मेसीको डकुमेन्ट्री बनाएका छन् ।

‘मलाई सगरमाथाको बारेमा थाहा छ', विख्यात फुटबलर जेरार्ड पीकेको यही भनाइबाट सुरु हुन्छ, किरणको डकुमेन्ट्री- ‘मेसी द म्यान एट बार्सा ।' विश्वविख्यात फुटबल क्लब बार्सिलोना र स्टार फुटबलर मसीबारे डकुमेन्ट्री बनाउन पहिलो नेपाली पत्रकारको रूपमा बार्सिलोना पुगेका पत्रकार किरणले बार्सिलोना र त्यहाँका खेलाडीलाई नेपालसँग जोड्न भरपुर प्रयास गरेका छन् । यो डकुमेन्ट्री नेपालको फुटबलमात्र होइन पर्यटन प्रवद्र्धनमा समेत उपयोगी हुनेछ ।
‘डकुमेन्ट्रीमा पीके, नेयमार जाभ र मेसिले नेपालको बारेमा खुलेर प्रशंसा गरेका दृश्य छन् । यस विषयले नेपालको पर्यटन प्रवद्र्धनमा ठूलो महत्वव राख्छ,' उनी भन्छन् ।

नेपालको बामे सर्दै गरेको फुटबल विकासका पनि यो डकुमेन्ट्री सहयोगी हुन सक्छ । क्लबका अध्यक्ष जोसेफ मारियो बार्तमेउले एक संवादमा भनेका छन्, ‘नेपाल जस्तो फुटबलमा रुचि राख्ने एसिया र अफ्रिकाका मुलुकहरूलाई सहयोग गर्न हामीसँग विशेष कार्यक्रम छ । त्यसको लागि नेपालको सरकारी निकायमार्फत जानुपर्ने हुन्छ ।' डकुमेन्ट्रीमा मेसीले नेपालका खेलप्रेमीलाई दिएको विशेष सन्देशमा आफू नेपाल घुम्न इच्छुक रहेको र समय मिलाएर नेपाल आउने पनि बताएका छन् । मेसी र पीकेले नेपालको प्राकृतिक सुन्दरताको समेत प्रशंसा गरेका छन् ।

‘एक नेपाली पत्रकारले बार्सिलोनाजस्तो क्लबको बारेमा डकुमेन्ट्री निर्माणको अवसर पाउनु मेरा लागि ठूलो गर्वको कुरा हो', उनले भने । नितान्त फरक र विश्वस्तरीय विषयमा बनेको हुनाले यो डकुमेन्ट्री नेपालका अन्य डकुमेन्ट्री मेकरका लागी पनि ठूलो प्रेरणा हुने किरणको विश्वास छ । यो ३० मिनेटको डकुमेन्ट्री हो । डकुमेन्ट्री चारवटा अन्तर्राष्ट्रिय फिल्म फेस्टिभलमा सहभागी भइसकेको छ । ‘२०१५ को अप्रिलमा छायांकन गरिएको डकुमेन्ट्रीलाई विश्वका विभिन्न देशबाट च्यारिटी सोको लागि अफर आइरहेको छ,' किरण भन्छन् ।

डकुमेन्ट्री बार्सिलोना क्लब र यसका मुख्य खेलाडी मेसीको वरपर घुमेको छ । क्लब र खेलाडीलाई नेपालसँग जोड्ने प्रयास पनि हो- डकुमेन्ट्री । यसमा नेपालसम्बन्धी धेरै प्रसंग पनि छन् । मेसी, नेयमार, पीके, जाभी र क्लबका अध्यक्षको मुख्य दृश्य यसमा समावेश छन् । बार्सिलोनाको प्रगतिको कथालाई पनि डकुमेन्ट्रीमा समेटिएको छ । क्यामनु, बार्साको प्रशिक्षण केन्द्र, म्युजियमलगायत अन्य रमाइला ठाउँको दृश्य पनि कैद गरिएको छ ।

बार्सिलोनाको प्रगतिको कथा र मेसीजस्ता खेलाडीलाई नजिकबाट बुझ्न यो डकुमेन्ट्री फलदायी हुनेछ । नेपालीका लागि अझै यो विशेष छ । मेसी, नेयमार, पीके, जाभीले नेपाली ढाकाटोपी लगाएर नेपालबारे व्यक्त गरेको विचार वास्तवमै संवेदनशील छन् । नेपालको सम्झनामा नेपाली झन्डा क्यामनुमा राखिएको छ । उक्त झन्डा किरणले नै क्लबका अध्यक्षलाई उपहार दिएका थिए ।

‘बार्सिलोनाजस्तो विश्वस्तीरय संस्थासँग जोडिन पाउनु हरेकको लागि गर्वको कुरा हो र यस्तो अवसर पाउने म पहिलो भाग्यमानी नेपाली थिएँ । तसर्थ त्यहाँ रहँदाको अनुभव ज्यादै स्वर्णिम रह्यो । विशेषगरी खेलाडीसँगको भेट अविस्मरणीय छ । उनीहरूसँग करिब दुई साता सँगै रहँदा मैले तीनवटा कुरा अनुभव गरेँ । पहिलो विश्वविख्यात खेलाडीहरूको सरलता, अनि खेलाडीको आत्मीयता र अर्को मेसीप्रतिको उनीहरूको सम्मान', किरण भन्छन् ।

‘मलाई उनीहरूले ठूलो प्रेम दर्शाए । त्यसैले म आज पनि उनीहरूसँग नियमित सम्पर्कमा छु । डकुमेन्ट्री निर्माणपश्चात् पनि मैले उनीहरूसँगको भेटघाटलाई निरन्तरता दिएको छु । बार्साको आतिथ्यमा क्यामनुमा बिताएका क्षण मेरो जीवनको सर्वाधिक सुन्दर समय हुन्,' किरणले भने ।
किरण अहिले बार्सासँगको आफ्नो सहकार्य र मेसीसँगको रोचक क्षणलाई लिएर पुस्तक पनि लेखिरहेका छन् ।

प्रतिकृया दिनुहोस

Annapurna635x90_1