MENU

लेनिन नचाउने अक्टोबर क्रान्ति

635x90_1

प्रा. श्रीधर गौतम बिहीबार, भदौ २९, २०७४ 1759 पटक पढिएको

Share This

Annapurna-635-pix-85pix_2

हतियारधारी देशहरूबाट बच्नको लागि पनि हामीले अक्टोबर क्रान्तिले छोडेको सन्देशलाई दह्रोसँग समात्नुपर्छ

ठीक सय वर्षअगाडि अर्थात् सन् १९१७ मा लेनिनको नेतृत्वमा रूसमा समाजवादी क्रान्ति भएको थियो। त्यस क्रान्तिले करोडौं रूसी जनतालाई जहानियाँ जारको शोषणयुक्त शासन तथा फ्रान्स, जर्मनी र ब्रिटेनको साम्राज्यवादी अत्याचारबाट मुक्ति दिलाएको थियो।आज सय वर्ष बितिसक्दा पनि जनताको अजेय शक्तिमा आधारित त्यो क्रान्तिको महत्वव संसारभरकै शोषितपीडित जनताका लागि उत्तिकै छ। किनकि त्यस क्रान्तिले सर्वप्रथम मानिसबाट मानिसको शोषण हुने शासन पद्धतिमाथि ठूलो धक्का दिएको थियो।

 

त्यो क्रान्ति सम्पन्न भएको २५ वर्ष नपुग्दै सोभियत संघको सेनाले त्यसअघि अजेय मानिएको हिटलर नेतृत्वको जर्मनीको फासीवादी सेनालाई परास्त गरी पूर्वीयुरोपका विभिन्न देशमा जनतान्त्रिक गणतन्त्रको लागि बाटो प्रशस्त गरिदिएको थियो।

त्यसैगरी सो क्रान्तिको ३० वर्षपछि सोभियत संघको सहयोगमा चीनको कम्युनिस्ट पार्टीले राष्ट्रिय जनवादी क्रान्ति सम्पन्न गरी साम्राज्यवादी शक्तिहरूद्वारा समर्थित चाङ काइ सेकको पार्टीलाई पराजित गरेको थियो। सोभियत नेता लेनिनले सन् १८७१ को पेरिस कम्युनबाट सिक्दै क्रान्तिलाई पूर्णता दिएका थिए।

भनिन्छ- जब अक्टोबर समाजवादी क्रान्ति पेरिस कम्युनभन्दा धेरै समयसम्म टिक्न सक्यो, उनी खुसीले नाचेका थिए। तर लेनिनका उत्तराधिकारी स्टालिनको मृत्युपछि रूसमा समाजवादी क्रान्तिलाई भत्काउने कार्यहरू भए र आजसम्म आइपुग्दा हिजोको सोभियत संघको ठाँउमा रूसमा एउटा पुँजीवादी व्यवस्था पुनस्र्थापित भएको छ। तैपनि सन् १९१७ को समाजवादी क्रान्तिले ल्याएका उपलब्धिहरूको कारणले उक्त क्रान्तिको महत्वव यथावत् छ।

अक्टोबर क्रान्ति तत्कालीन रूसका किसान, सैनिक र श्रमिकहरूको बलमा भएको थियो। त्यहाँका जनता वर्ग संघर्षको लामो प्रक्रियाबाट गुज्रेका थिए र उनीहरूले अनुशासित ढंगबाट बोल्सेभिक पार्टीको नेतृत्वमा आफ्ना क्रियाकलाप अगाडि बढाएका थिए।

प्रथम विश्वयुद्धताकाको दुःखद अनुभव उनीहरूसँग थियो र उनीहरू लेनिन नेतृत्वको बोल्सेभिक पार्टीले मात्र उनीहरूको देशलाई अन्तर्राष्ट्रिय साम्राज्यवाद, सामन्तवाद र अन्तर्राष्ट्रिय पुँजीवादी पद्धतिबाट मुक्त गरी जनतालाई शान्ति, भोजन र जोत्नका लागि जमिन दिन सक्छ भन्नेमा विश्वस्त थिए। त्यही आशाअनुरूप क्रान्तिपछि त्यहाँको बोल्सेभिक पार्टीले जोत्नको लागि जमिन प्रदान गर्‍यो।

बोल्सेभिक पार्टीका नीतिहरूलाई व्यवहारमा लागू नगरिएको भए क्रान्तिपछिको गृहयुद्धको स्थितिमा त्यहाँ क्रान्तिले सफलता पाउने थिएन। त्यसैगरी अर्को सफलताको कारणको रूपमा रहेको थियो- आत्मनिर्णयको अधिकारसहितका अन्य अधिकार युक्रेन, जर्जियालगायतका देशका जनतालाई दिनु। यसले गर्दा साम्राज्यवादी शक्तिहरूले त्यहाँको अवस्थाको फाइदा उठाए र जतामा फुट ल्याउन सकेनन्।

 

अहिलेको आणविक हतियारको होडबाजी कुनै देशलाई रक्षा गर्नु अथवा जनतालाई सुख दिनु नभई केही व्यक्ति र तिनले प्रतिनिधित्व गरेको वर्गको हित पूर्ति गर्नको लागि हो। यसले समग्रमा मानव जाति सधैं त्रास र निराशामा बाँचिरहनेछ।

 

उदाहरणको लागि सन् १९१८ को मध्यतिर अर्थात् अक्टोबर क्रान्ति सफल भएको केही महिनापछि नै पुरानो जार सत्ताका सेनाले ब्रिटेन, फ्रान्स, अमेरिका र जापानसँग मिलेर विदेशी हस्तक्षेप निम्त्याएका थिए तर रसियन कामदार वर्गको अक्टोबर क्रान्तिप्रतिको समर्थनले त्यो हस्तक्षेप विफल हुन पुग्यो।

अक्टोबर क्रान्तिले रूसी साम्राज्यभित्र र बाहिरका देशका जनतालाई शोषण र अत्याचारबाट मुक्त नगरेको भए त्यो क्रान्तिले पूर्णता पाउन सक्ने थिएन। लेनिनको नेतृत्वको बोल्सेभिक पार्टीले जार शासनअन्तर्गत दबिएका राष्ट्रका नागरिकलाई आआफ्नै प्रकारले फल्न फुल्न दिने घोषणा गरेको हुँदा ती राष्ट्रका जनताले आफूखुसी सोभियत समाजवादी गणतन्त्रात्मक संघमा प्रवेश गरे।

त्यही संघको कारणबाट सोभियत युनियनको आर्थिक, सांस्कृतिक र राजनीतिक शक्तिको पनि जग बस्न गयो। सोभियत समाजवादी सत्ताविरोधी देशीविदेशी शक्तिहरूले राष्ट्रलाई गृहयुद्धमा धकेले र करिब ७० लाख जनताको ज्यान गयो। तैपनि अन्त्यमा सोभियत कामदार वर्गको ऐक्यबद्धताले साम्राज्यवादी शक्तिहरू पराजित भए।
त्यही समाजवादी शक्तिको विजयको कारणले द्वितीय विश्वयुद्धमा सोभियत संघले जर्मनीका हिटलरको नेतृत्वको फासीवादविरुद्ध निर्णायक लडाइँ लड्यो।

भारतका प्रथम प्रधानमन्त्री जवाहरलाल नेहरूले त्यतिबेलाको सोभियत संघको प्रशंसा आफ्नो आत्मकथामा गरेका छन् र आफू समाजवादी क्रान्तिबाट धेरै प्रभावित भएको उल्लेख गरेका छन्। त्यति मात्र होइन, द्वितीय विश्वयुद्ध उत्कर्षमा पुगेको बेला सन् १९४२ मा अमेरिकी जनरल डगलस मेक अर्थरले पनि रूसी व्यवस्थाको प्रशंसा गरेका थिए। 'द ग्रेट कन्स्प्रेसी' नामक पुस्तकको १३८ पेजमा उनले रसियन सेनाको साहस र वीरतामै मानव जातिको सभ्यताको रक्षाको आशा रहेको बताएका छन्।

अर्थरले आफ्नो जीवनमा धेरै लडाइँ र संघर्षका घटनाहरू अनुभव गरे पनि सोभियत सेनाको जस्तो साहस कहिल्यै नदेखेको बताएका छन्। अहिलेसम्म अपराजित हिटलरको फासीवादलाई सोभियत संघको सहभागिताविना पराजित गर्न नसकिने उनले उल्लेख गरेका छन्।

सोही किताबमा ब्रिटेनका तत्कालीन प्रधानमन्त्री विन्सटन चर्चिलले ‘संसारमा कुनै पनि सेनाले सोभियत सेनाले जस्तो कठिन परिस्थिति झेल्नुनपरेको र त्यसो हुँदाहुँदै पनि सोभियत सेनाले हिटलरको सेनामाथि गरेको आक्रमणले नै संसारलाई फासीबादबाट मुक्त गर्न सकिएको उल्लेख छ।

अक्टोबर क्रान्ति सफल नभएको भए सोभियत संघ या सोभियत सेनाको निर्माण हुने थिएन र द्वितीय विश्वयुद्धमा हिटलरका सेनाले पश्चिमी देशहरूलाई पराजित गर्ने सम्भावना रहन्थ्यो। तर दुःखको कुरा, आज संसारमा अक्टोबर क्रान्तिको महत्ववलाई बेवास्ता गरिएको छ र त्यसको गम्भीर परिणाम मानव जातिले भोग्नुपरेको छ।
शीतयुद्धको समाप्तिपछि संसारमा स्थायी शान्ति हुन्छ भन्ने आशा समाप्त भएको छ।

आज पुनः पुँजीवादी र साम्राज्यवादी शक्तिहरूबीचको अन्तरविरोध बढिरहेको छ र संसार आणविक युद्धको सिकार हुने खतरामा छ। एकातिर अमेरिका, ब्रिटेन, फ्रान्स र अर्कोतिर रूसबीचको अन्तरविरोधले सम्पूर्ण युरोपेली र अमेरिकी जनतालाई त्रासपूर्ण अवस्थामा पुर्‍याएको छ। अमेरिका र रूससँग मात्रै ९३ प्रतिशत आणविक हतियार भएको खुलासा भएको छ।

अमेरिकी नेतृत्वमा नेटो गठबन्धनलाई युरोपका विभिन्न देशमा फैलाइएको छ। उसो त पोल्यान्ड फिनल्यान्ड, स्विेडन र नर्वेजस्ता युरोपियन देशका न्यायप्रेमी जनता नेटो विस्तारको विरोध गरिरहेका छन्, तैपनि ती देशका सरकारले अमेरिकी सरकारसँग मिलेर उनीहरूकै घरदैलोमा ठूलाठूला सैनिक अड्डाहरू स्थापित गरेका छन्।

जसले गर्दा त्यहाँका जनता र गौचरनका पशुहरूले समेत दिनरात जंगी-लडाकु जहाजहरूको आवाजका कारण विभिन्न रोगको सिकार हुनुपरेको छ। ती देशमा केही महिनाअघि भएका विरोधसभामा ती देशका पुलिसले बल प्रयोग गरी कैयन्लाई घाइते बनाएका थिए।

यतिमात्र हैन, अमेरिकी सरकारले अन्तरिक्षलाई समेत आणविकीकरण गरिरहेको छ। आफ्ना विरोधी देशलाई आवश्यक परेमा आणविक हमला गर्ने योजना बनाएको खबर अमेरिकाबाट छापिने ‘स्पेस अलर्ट' पत्रिकाको २०१७ को अगस्त अंकमा उल्लेख छ। त्यस पत्रिकाले अमेरिकाले दक्षिण कोरियामा राखेको ‘थाड' अर्थात् ‘टर्मिनल हाई एल्टिच्युड एरिया डिफेन्स पद्धति' को विरोध भएको लेखेको छ।

दक्षिण कोरियाका जनताको विरोध हुँदाहुँदै पनि रातको समयमा ती हतिहार समुद्री जहाजबाट निकाली हजारौं पुलिसको घेराबन्दीको बीच घना बस्तीनजिकै एक टापुमा राखिएको थियो। उत्तर कोरियासँग अमेरिकाको बढ्दो अन्तरविरोधले ती हतियार प्रयोग भयो भने दक्षिण कोरिया, जापान, चीनलगायतका जनता त्यसबाट प्रभावित हुनेछन्।

अमेरिकी जनताले समेत गत अप्रिल ७-९ मा त्यहाँको अलाबामा राज्यको हन्टसभिले सहरमा युद्धविरोधी सम्मेलन गरेका थिए। त्यस सम्मेलनले अन्तरिक्षलाई आणविकीकरण गर्न नहुने र 'थाड' लाई दक्षिण कोरियामा नराख्न दबाब दियो। तर पनि अमेरिकाले यस्ता आवाज सुन्न चाहेको देखिँदैन।

अन्तरिक्षलाई समेत आफ्नो पेवा बनाई त्यसमाथि अधिकार प्राप्त गरी सम्पूर्ण संसारलाई आफ्नो नियन्त्रणमा राख्ने नीति उसले लिएको छ। सोही सम्मेलनले वातावरण परिवर्तनसम्बन्धी संकट हटाउन पनि आह्वान गरेको थियो, तर अमेरिकाले त्यसको सट्टा वातावरणसम्बन्धी पेरिस सम्झौताबाट आफूलाई अलग गर्‍यो। अमेरिका आफैं वातावरण परिवर्तनबाट पीडित छ। केही दिनअघि मात्र अमेरिकाको टेक्सास र फ्लोरिडामा आएको आँधीबेहरीले मच्चाएको उत्पात वातावरण परिवर्तनको उपज थियो।

अहिले संसारमा देखिएको संकटको कारण साम्राज्यवादी अर्थात् शोषणमूलक व्यवस्था हो। जबसम्म ससाना र कमजोर देशहरूको शोषण गर्ने र उत्पीडित जनतामाथि दमन गर्ने शासन पद्धति रहिरहन्छ, तबसम्म संसारमा वातावरणीय परिवर्तन पनि रोकिँदैन र द्वितीय विश्वयुद्धभन्दा कैंयन् गुणा खतरनाक युद्धबाट पनि विश्वलाई बचाउन सकिँदैन।

यस्तो संकटको सामना गर्ने उपाय अक्टोबर क्रान्तिको भावनालाई राम्ररी समात्नु हो। अर्थात् एक राष्ट्रले अर्को राष्ट्रलाई र एउटा मान्छेले अर्को मान्छेलाई शोषण गर्ने व्यवस्था अन्त्य गर्नु हो। नेपालको सन्दर्भमा पनि अक्टोबर क्रान्तिको उत्तिकै महत्वव छ।

हामी भारत, चीन र पाकिस्तानजस्ता आणविक हतियारबाट सुसज्जित देशबाट घेरिएका छौं। ती देशबीचको अन्तरविरोधले उनीहरूलाई मात्रै होइन, हामीलाई पनि समाप्त पार्न सक्छ। त्यस्ता हतियारधारी देशहरूबाट बच्न पनि हामीले अक्टोबर क्रान्तिले छोडेको सन्देशलाई दह्रोसँग समात्नुपर्छ।

भर्खरै मात्र भारत-चीनबीचमा एउटा ठूलो युद्ध हुनबाट रोकियो। त्यस्तो सम्भावना नहोस् भन्नको लागि पनि हामीले अक्टोबर क्रान्तिको शिक्षा मनन गर्नुपर्छ र निहित स्वार्थ तथा शोषणको लागि गरिने युद्धको विरोध गर्नुपर्छ। यसको अर्थ संसारलाई सबै प्रकारका शोषणबाट मुक्ति दिलाउनुपर्छ। जबसम्म पुँजीपति वर्गका केही व्यक्तिको आर्थिक हितको लागि शासन व्यवस्थालाई साधन बनाइन्छ, त्यतिबेलासम्म संसारमा स्थायी शान्ति सम्भव हुँदैन।

अहिले देखिएको पीडक र पीडित राज्यहरूबीचको समस्याको पनि समाधान हुँदैन। अहिले संसारमा देखिएको आणविक हतियारको होडबाजी कुनै देशलाई रक्षा गर्नु अथवा जनतालाई सुख दिनु नभई केही व्यक्तिहरू र तिनले प्रतिनिधित्व वर्गको हित पूर्ति गर्नको लागि हो।

यस्तो होडबाजीले केही व्यक्तिलाई सबै सुखसयल प्राप्त भए पनि समग्रमा मानव जाति सधैं त्रास र निराशामा बाँचिरहनेछ।त्यसैले हामीले संसारमा देखिएका सबै प्रकारका निहित स्वार्थको लागि गरिने युद्धको विरुद्धमा आवाज उठाउनुपर्छ। यसो भएमा मात्र अक्टोबर क्रान्तिले परिकल्पना गरेको शोषणरहित समाज र संसारको स्थापनामा बल पुग्नेछ।

प्रतिकृया दिनुहोस

Annapurna635x90_1