MENU

एसीसी यू-१९ एसिया कप : ब्याटिङसँग जोडिएको नेपालको आशा

अन्नपूर्ण शनिवार, कात्तिक २५, २०७४ 1768 पटक पढिएको

Share This

635-X-85_1

काठमाडौं : एसीसी यू-१९ युथ एसिया कप क्रिकेट प्रतियोगितामा नेपालले शनिबार बंगलादेशविरुद्धको खेलसँगै आफ्नो यात्रा सुरु गर्दैछ । अन्य प्रतियोगितामा प्रतिस्पर्धा गरिरहे पनि टेस्ट मान्यता पाएको बंगलादेशको युवा टोलीविरुद्ध यू-१९ एसिया कपमा नेपालले पहिलोपटक प्रतिस्पर्धा गर्न लागेको हो । सन् २०१२ बाट सुरु भएको यू-१९ एसिया कपमा नेपालले यसअघिका तीनमध्ये कुनै पनि संस्करणमा बंगलादेशसँग प्रतिस्पर्धा गरेको छैन ।

नेपालकै समूहमा रहेको साविक विजेता भारतले पहिलो दिन शुक्रबार आयोजक मलेसियालाई दुई सय दुई रनले हरायो । उक्त नतिजापछि नेपालले सेमिफाइनल प्रवेशका लागि बंगलादेशविरुद्धको खेल जित्नैपर्ने दबाब बढेको छ । बंगलादेशसँग पराजित भए समूह ‘ए’बाट सेमिफाइनल पुग्ने नेपालको सम्भावना निकै कठिन हुनेछ । प्रतियोगिताको दुई समूहका विजेता र उपविजेता टोली सेमिफाइनलमा पुग्ने प्रावधान छ ।

नेपालले प्रतियोगिताका लागि मलेसिया प्रस्थान गर्नुअघि बंगलादेशसँग उसकै मैदानमा तीनवटा अभ्यास खेल खेलेको थियो । तीनमध्ये सुरुआती दुई अभ्यास खेलमा पराजय बेहोरेको नेपालले अन्तिम खेलमा भने जित हात पारेको थियो । सुरुआती ब्याट्सम्यान मोहम्मद आसिफ सेखले ९० रन प्रहार गरेपछि नेपालले दुई सय २६ रनको लक्ष्य ४६.३ ओभरमा चार विकेट गुमाउँदै पूरा गरेको थियो । आसिफबाहेक अर्का सुरुआती ब्याट्सम्यान जितेन्द्र सिंहले पनि ४५ रन बनाएका थिए ।

त्यसअघिका दुई खेलमा नेपाली टोलीले बलिङतर्फ सन्तोषजनक प्रदर्शन गरे पनि ब्याटिङ नचल्दा पराजय बेहोर्नु परेको थियो । पहिलो अभ्यास खेलमा आसिफले ३२ रन र दोस्रो अभ्यास खेलमा रसिद खानले २४ रन बनाएका थिए । अन्य ब्याट्सम्यानले भने त्योभन्दा बढी रन बनाउन सकेका थिएनन् । त्यसैले बंगलादेशविरुद्ध शनिबारको खेलमा नेपाली टोलीको जितका लागि ब्याटिङ नै चिन्ताको विषय बनेको छ ।

नेपाली युवा टोलीले पछिल्लो समय ब्याटिङमा निकै संघर्ष गरिरहेको छ । यसअघि गत जुलाईमा सिंगापुरमा भएको यू-१९ विश्वकपको एसियाली छनोटमा पनि ब्याटिङकै कारण नेपाली युवा टोली पछि परेको थियो । नेपालले गत सेप्टेम्बरमा मलेसियामै भएको यसै प्रतियोगिताको छनोट खेलमा समेत बलियो टोलीविरुद्ध निरन्तर विकेट गुमाएको थियो । त्यसैले बंगलादेशलाई पराजित गर्न नेपालले बलिङमा मात्रै राम्रो गरेर पुग्नेछैन, ब्याटिङमा पनि राम्रो प्रदर्शन गर्नुपर्नेछ ।

720x90_1
 
720x90
730-x-90-annapurnapost

प्रतिकृया दिनुहोस

635x90_2