MENU

एएफसी एसिया कप छनोट: फिलिपिन्ससँग प्रतिष्ठाको लडाइँ

अन्नपूर्ण मंगलवार, कात्तिक २८, २०७४ 851 पटक पढिएको

Share This

635-X-85_1

काठमाडौं: एएफसी एसिया कप छनोट फुटबलबाट बाहिरिइसकेको नेपालले मंगलबार घरेलु मैदानमा फिलिपिन्ससँग प्रतिस्पर्धा गर्दैछ । यसअघि फिलिपिन्ससँगको अवे खेलमा ४-१ गोलको हार खेपेको नेपालका लागि यो खेल प्रतिष्ठाको लडाइँ हुनेछ ।

नेपालले यसअघि गत चैतमा फिलिपिन्ससँग खेलेको थियो । सातदोबाटोस्थित एन्फा मैदानमा हुने खेल नेपालले आफ्नो स्तर सुधारका लागि खेल्ने टोलीका प्रशिक्षक ग्योतुकी कोजीले बताए ।
‘फिलिपिन्स समूहको बलियो टोली हो । घरेलु मैदानको फाइदा लिँदै हामी फिलिपिन्सलाई रोक्ने प्रयास गर्नेछौं,' सोमबार आयोजित पत्रकारसम्मेलनमा कोजीले भने ।

फिलिपिन्सका प्रशिक्षक थोमस डोलेले नेपालसँगको खेल आफ्ना लागि निकै महत्वपूर्ण रहेको बताए । ‘हामी थप तीन अंक खोस्ने प्रयास गर्नेछौं । नेपालले पछिल्लो समय खेलमा सुधार गरिरहेको छ तर, अघिल्लो चरणमा पुग्न हाम्रा लागि जित आवश्यक छ । खेलाडीले शतप्रतिशत मेहनत गर्नेमा म विश्वस्त छु,' थोमसले भने ।

नेपाली टोलीका कप्तान अनिल गुरुङले फिलिपिन्सविरुद्धको खेल आफ्नो लागि विशेष रहेकोले यसलाई स्मरणीय बनाउने बताए । छनोटअन्तर्गत ताजकिस्तानविरुद्धको अघिल्लो खेलमा टोली बाहिर राखिएका अनिललाई यसपटक भने समावेश गरिएको छ । अनिलले यही खेलपछि अन्तर्राष्ट्रिय फुटबलबाट सन्न्यास लिने तयारी गरेका छन् । यो राष्ट्रिय टोलीमा उनको ५०औं क्याप हुनेछ । पछिल्लो १० वर्ष राष्ट्रिय टोलीमा रोजाइका स्ट्राइकर अनिलले नेपालका लागि नौ गोल गरेका छन् । यसपटक अनिलसँगै मिडफिल्डमा जगजित श्रेष्ठले पनि पुनरागमन गरेका छन् । केही समय टोलीमा नदेखिएका जगजित अस्ट्रेलियामा व्यावसायिक फुटबल खेल्दै आएका थिए ।

प्रशिक्षक कोजीले सोमबार नै अनिल र जगजितसहितको २३ सदस्यीय टोलीको घोषणा पनि गरेका छन् । टोलीमा तीनजना गोलरक्षक, सातजना रक्षक, आठजना मिडफिल्डर र पाँचजना स्ट्राइकर रहेका छन् । गोलरक्षकमा किरण चेम्जोङ, विकेश कुथु र विशाल श्रेष्ठ छन् । रक्षकमा विराज महर्जन, रोहित चन्द, अनन्त तामाङ, कमल श्रेष्ठ, जितेन्द्र कार्की, राजेन्द्र रावल र दिनेश राजवंशी छन् ।

यसैगरी मिडफिल्डमा सुजल श्रेष्ठ, विशाल राई, विक्रम लामा, अञ्जन विष्ट, जगजित श्रेष्ठ, हेमन गुरुङ, हेमन्त थापामगर र सुनील बल छन् । स्ट्राइकरमा अनिल गुरुङ, विमल घर्तीमगर, भरत खवास, नवयुग श्रेष्ठ र जर्ज प्रिन्स कार्की रहेका छन् । नेपाली टोली एक महिनाअघि खेलिएको महत्वपूर्ण खेलमा ताजकिस्तानसँग ३-० गोलले पराजित हुँदै छनोट चरणबाटै बाहिरिएको थियो । ताजकिस्तानविरुद्ध उसैको मैदानमा खेलेको नेपालले पहिलो हाफमा एक र दोस्रो हाफमा दुई पेनाल्टी गोल खाएको थियो ।

त्यसअघि नेपाली टोली ताजकिस्तानसँग घरेलु मैदानमा २-१ गोलले पराजित भएको थियो । नेपाल सम्मिलित समूह ‘एफ' मा फिलिपिन्स, यमन र ताजकिस्तान छन् । समूहमा नेपालले चारवटा खेल खेलिसकेको छ । नेपालले यसअघिका खेलमा एउटा पनि जित हात पार्न सकेको छैन । गत जेठमा घरेलु मैदानमा खेलिएको खेलमा नेपाली टोली यमनसँग गोलरहित बराबरीमा रोकिएको थियो ।

समूह ‘एफ' मा रहेको नेपाल एक अंकका साथ अन्तिम स्थानमा छ । तालिकाको शीर्ष स्थानमा आसीन फिलिपिन्सको आठ अंक छ । यमन र ताजकिस्तानले ६/६ अंक बटुलेका छन् । नेपालले समूहगत चरणको अन्तिम खेल यमनसँग आगामी वर्ष मार्च १८ तारिखमा उसैको मैदानमा खेल्नेछ । समूहमा समावेश प्रत्येक टोलीसँग ‘होम एन्ड अवे' प्रणालीमा खेलिने छनोट प्रतियोगिताका शीर्ष दुई टोली सन् २०१९ मा यूएईमा आयोजना हुने एसिया कपका लागि सीधै छनोट हुनेछन् ।

720x90_1
 
720x90
730-x-90-annapurnapost

प्रतिकृया दिनुहोस

635x90_2