MENU

म रोमान्टिक छु

अशोकप्यासी रार्इ शुक्रवार, साउन २७, २०७४ 5378 पटक पढिएको

Share This

दुई वर्षअघिको कुरा हो । ईशा चौधरी नयाँदिल्लीमा थिइन् । एकजना भारतीय केटा साथीसँग डिनर गर्न गएकी थिइन् । रेस्टुराँका वेटरले ठूलो बुके, सेम्पेन ल्याएर टेबुलमा राखिदिए । ईशासँग डिनर गएका केटोले घुँडा टेके । शिर निहुराए अनि त्यो बुके ईशालाई थमाइदिए । बुकेमा लेखिएको थियो, 'विल यु माई गर्लफ्रेन्ड ? ' ईशा अक्क न बक्क परिन् । यताउता हेरिन् । अनि अँ... अँ... गर्दै अन्तिममा 'नो' भनिदिइन् । ईशाको जीवनमा यस्ता धेरै स्मणीय क्षणहरू छन् । उनीसँग मायाको साइनो जोड्न विभिन्न शैलीमा उनलाई प्रस्ताव राखिएका छन् । 'मलाई सैयौंले विवाह एवं प्रेमका लागि अफर गरेका छन्', ईशा भन्छिन्, 'सामाजिक सञ्जालका कारण अहिले सबैलाई एक्सेस छ।'

अहिलेको युगमा कुन मोडेल नायिकालाई ग्ल्यामरस बन्ने चाहना हुँदैन ? तर ग्ल्यामरस, सेक्सी, हट भए पनि प्रभावकारी अभिनय भएन भने खल्लो लाग्छ । त्यस्तो हुन दिन्नँ भन्ने आत्मविश्वास ममा छ ।

भारतीय टेलिभिजन च्यानल एमटीभीबाट प्रसारण हुँदै आएको डेटिङ रियालिटी सो 'स्प्लिटस्भिल्ला'को दसौं संस्करणमा प्रवेश पाएपछि अहिले ईशा चर्चामा छिन् । विभिन्न मुलुकमा भएको अडिसनमा सैयौं मोडेललाई उछिन्दै उनी उत्कृष्ट ११ मा पर्न सफल भएकी छन् । अभिनेत्री सन्नी लियोन र रणविजयले होस्ट गर्दै आएको यो रियालिटी सो निकै लोकप्रिय छ । ललितपुर भैंसेपाटी निवासी उनले नेपालका विभिन्न फेसन सोमा क्याटवक गरेकी छन् । एमटीभीको 'स्प्लिटस्भिल्ला'बाट करिअर सुरु गरेकी उनी अभिनय यात्रा आरम्भ गर्ने तयारीमा छिन् ।

'स्प्लिटस्भिल्ला'को दोस्रो संस्करण हेरेदेखि नै उनलाई यस रियालिटी सोमा जाने रहर जागेको हो । त्यो सपना १०औं संस्करणमा पूरा भयो । 'स्कुलमा साथीहरू डाक्टर, पाइलट, इन्जिनियर बन्छु भन्थे तर म 'स्प्लिटस्भिल्ला'मा गएर माया खोज्छु भन्थेँ', ईशाले भनिन्, 'म सन्नी लियोनको ठूलो फ्यान हुँ । सोमा उनलाई भेट्दा, बोल्दा म बेहोशै भएँ ।' ईशाका अनुसार यस सोका विजेताले विग बोसको आगामी सिजनमा प्रवेश पाउनेछ । 'नेम, फेम, पुरस्कारसँगै बलिउडका लागि ढोका खुल्न पनि सक्छ', उनले भनिन्, 'सो एकदमै रमाइलो छ तर किसिङ एपिसोड देख्दा ममी, अंकल, आन्टीलाई चाहिँ नहेर्नु भन्नुपर्ला ।'

 म जस्तो सोच राख्छु, हाम्रो समाजमा त्यस्तो सोच कमैमा मात्रै होला । २० वर्षकी भएँ । रोमान्टिक स्वभावकी छु । मलाई ठूला प्रपोजल, पैसा, लुक्सभन्दा पनि मेरो मान्छे रोमान्टिक, स्पार्क अनि म्याजिक होस्जस्तो लाग्छ ।

ईशालाई अभिनय, मोडलिङ र भीजेमा रुचि छ । 'चलचित्रका लागि कुरा हुँदैछ । मैले राम्रो कुराको अपेक्षा गरेको छु । सपना ठूलो छ तर भाग्य पनि चाहिन्छ', उनले भनिन्, 'म चलचित्रमा प्रवेश गर्ने बेलामा यो क्षेत्रको जुन उचाइ छ, त्यसले मलाई थप उत्साहित बनाएको छ ।' उनको अनुभवमा कतिपय कलाकार वर्षौंसम्म थिएटरमै अल्झिरहेका छन् । तर, केहीले केही नसिकी एकैपटक फिल्ममा डेब्यु गरेर तहल्का मच्चाएका उदाहरण पनि छन् ।

त्यसैले अभिनयमा राइट टाइम, राइट टिम, राइट प्लेस र लक चाहिन्छ भन्ने उनको मान्यता छ । चलचित्र ड्रिम्स, चपली हाइट टु, लुटजस्ता चलचित्र हेरेकी उनी आफूले चाहेजस्तो हुने भए अनमोल केसीसँग चलचित्रमा डेब्यु गर्न चाहन्छिन् । अभिनेतामा राजेश हमाल, भुवन केसी र अनमोल केसीकी फ्यान उनी अभिनेत्रीमा निशा अधिकारी र परामिता राणाबाट प्रभावित छिन् ।

कोहीसँग मेरो मन बसेको छ । ऊसँग केमेस्ट्री, कनेक्सन मिल्छ । तर, विवाह गर्ने सोच तय भएको छैन । मलाई साँच्चिकै माया गर्छ, करिअरलाई साथ दिन्छ भने विवाह हुन पनि सक्छ । विवाह अनप्रेडिक्टेबल हुन्छ । 

आफूलाई फिट एन्ड फाइन राख्न हल्का व्यायाम गरी खानपानमा ध्यान दिने गर्छिन् । 'चिकेन अलि बढी खान्छु । स्मोक गर्दिनँ । ड्रिंक्स हल्कामात्र गर्छु । पानी धेरै पिउँछु', उनले भनिन् । चिकेन बढी खाने बानीले मेनटेनमा अलि गाह्रो हुने गरेको उनको भनाइ छ । आफू कसैको मनमा बसेको र सो कुरा 'स्प्लिटस्भिल्ला' हेरेपछि दर्शकले थाहा पाउने उनको भनाइ छ । विवाहभन्दा लिभिङ टुगेदरको फाइदा भए पनि आफू त्यो पक्षमा नरहेको उनी बताउँछिन् । 'पछिल्लो समय धेरै डिभोर्स भइरहेको छ । लिभिङ टुगेदरमा गयो भने ब्रेकअप हुन्छ डिभोर्स हुँदै', ईशाले कारण भनिन्, 'डिभोर्स हुँदा दुई परिवारको भावना पनि भत्किन्छ । कति पैसा सकिन्छ । मलाईचाहिँ विवाह गरेरै लगोस् जस्तो लाग्छ ।'

 

 

 

प्रतिकृया दिनुहोस

Annapurna Post1140X100