टिपरको ठक्करबाट तीन विद्यार्थी गम्भीर घाइते
मलंगवा : सर्लाहीको बरहथवा नगरपालिका ३ हजरिया झिँयाही टोलमा टिपरको ठक्करबाट तीनजना विद्यार्थी घाइते भएका छन्। दुर्घटनामा स्थानीय मुनलाइट बोर्डिङ स्कुलको कक्षा १० मा अध्ययनरत बागमती नगरपालिका ७ राजघाटका अनिल साह, कौडेनाका राजीव यादव र सिरहा गोलबजारका रोहन थापा घाइते भएका हुन्।
बुधवार दिउँसो गाउँको भित्री सडकमा बा ४९ प ७२५ नम्बरको मोटरसाइकलमा चढेर हिँडिरहेका बेला ना ७ प २२८६ नम्बरको को ग्राभेल बोकेको टिपरले उनीहरुलाई ठक्कर दिएको इलाका प्रहरी कार्यालय बरहथवाले जनाएको छ। घाइतेलाई बरहथवामा सामान्य उपचार गरी चितवनको भरतपुर रेफर गरिएको छ। टिपरका चालक र टिपरलाई नियन्त्रणमा लिइएको बरहथवाका प्रहरी निरीक्षक आमोदकुमार खेरवारले जानकारी दिए।
दुर्घटनापछि आक्रोशित बनेका गाँउलेले टिपर र त्यसका चालकमाथि आक्रमणको प्रयास गरेको थियो। दुर्घटना स्थलमा चालकविरुद्ध स्थानीयको आक्रोश व्यक्त गरेपछि कडा सुरक्षामा चालक र टिपरलाई बरहथवा ल्याएको छ।