भक्तपुर: भक्तपुरका थप ७ हजार ७९७ जनाले कोरोना भाइरसविरुद्धको खोप लिएका छन् । बुधबारदेखि सुरु भएको खोप कार्यक्रमअन्तर्गत भक्तपुरका ५५ देखि ५९ वर्ष उमेर समूहका उक्त संख्याले भेरोसेल खोपको पहिलो मात्रा लिएका हुन् ।
स्वास्थ्य कार्यालय भक्तपुरका अनुसार ३ हजार ९९३ जना महिला र ३ हजार ८०४ जना पुरुष गरी ७ हजार ७९७ जनाले भेरोसेल खोपको पहिलो मात्रा लिएका छन् ।
कार्यालयका प्रमुख कृष्ण मिजारले भक्तपुरका ४ नपाका ३८ वटा वडास्थित खोप केन्द्र बिहीबार पनि खोप दिइरहेको जानकारी दिए ।
बुधबार सूर्यविनायक नपाले एकहजार ५६८ जना महिला र एकहजार ५०४ जना पुरुष गरी ३ हजार ७२ जनालाई खोप दिएको छ ।भक्तपुर नपाले एकहजार ३९६ जना महिला र एकहजार ३५२ जना पुरुष गरी २ हजार ७४८ जनालाई खोप दिँदा चाँगुनारायण नपाले ८०९ जना महिला र ७५२ जना पुरुष गरी एकहजार ५६१ जनालाई पहिलो मात्राको खोप दिएको छ ।
मध्यपुर थिमि नपाले २२० महिला र १९६ पुरुष गरी ४१६ जनालाई मात्रै खोप दिएको छ । नपाले पहिलो दिन नेपाल कोरिया मैत्री नगरपालिका अस्पतालबाट मात्रै खोप दिएको थियो । पहिलेजस्तो वडा वडाबाट खोप नदिएपछि स्थानीयले आक्रोश पोखेका थिए । जनप्रतिनिधिहरुले समेत पहिले जस्तै वडा वडाबाटै खोप दिन माग गर्दा पनि नगरको स्वास्थ्य शाखाले नसुनेको एक वडा अध्यक्षले गुनासो गरे ।
नेपाल कोरिया मैत्री नगरपालिका अस्पतालमा खोप लगाउने सर्वसाधारणको भीड बढेपछि उल्टै कोरोना संक्रमण फैलिने सम्भावना बढेपछि बिहीबार नपाका ९ वटा वडामा समेत खोप केन्द्र तोकी खोप दिने कार्य भइरहेको नपाका प्रवक्ता वडा नं. २ का अध्यक्ष राम थापामगरले जानकारी दिए ।यससँगै अहिलेसम्म भक्तपुरका ६९ हजार ५९७ जनाले कोरोना भाइरसविरुद्धको खोप पाएका छन् ।
यसअघि भक्तपुरका ६१ हजार ८०० जनाले कोरोना भाइरसविरुद्धको खोपको पूर्ण मात्रा लिइसकेका छन् ।स्वास्थ्य कार्यालय भक्तपुरका ६० देखि ६४ वर्ष उमेर समूहका १३ हजार ७७८ जना र १८ वर्षमाथिका ४८ हजार २२ जनाले भेरोसेल खोपको पूरा मात्रा लिइसकेका छन् ।
कार्यालयका प्रमुख मिजारले भक्तपुरबाट कोभिड १९ विरुद्ध अग्रपंक्तिमा रहेर काम गर्ने चिकित्सक तथा स्वास्थ्यकर्मी, सुरक्षाकर्मी, सञ्चारकर्मी, सरकारी कर्मचारी, बैंक तथा वित्तीय संस्था र नेपाल विद्युत प्राधिकरण तथा नेपाल टेलिकमका कर्मचारी गरी ५ हजार ५७५ जनाले कोभिशिल्ड खोपको पूरा मात्रा लगाइसकेका छन् ।
तर कोभिशिल्ड खोपकै पहिलो मात्रा लिएका ७४ वर्षमाथिका ५ हजार ८२७ भक्तपुरवासीले दोस्रो मात्रा लगाउन पाएका छैनन् ।
भक्तपुरमा हालसम्म २२ हजार ६६७ जनामा कोरोना भाइरस संक्रमण पुष्टि भइसकेको छ । जसमा २१ हजार ७८८ जना डिस्चार्ज हुँदा १९४ पुरुष र १०६ महिला गरी ३०० जना संक्रमितको मृत्यु भइसकेको छ । भक्तपुरमा अझै ५७९ जना सक्रिय संक्रमित रहेका छन् ।
प्रतिक्रिया दिनुहोस !
