प्यूठान : प्यूठानको नौवहिनी गाउँपालिका क्षेत्रमा मंगलबार भारी बर्षा भएको छ। बर्षाले ठाउँ ठाउँमा पहिरो गएर सडक अवरुद्ध भएको नौवहिनी गाउँपालिकाका प्रमुख प्रशासकीय अधिकृत शिवराज पौडेलले जानकारी दिए ।
यस क्षेत्रकै धेरै व्यस्त हुने बाग्दुला–बाहाने सडक पहिरोले पूर्ण रुपमा अवरुद्ध भएको छ । जिल्लाको प्रमुख बजार बाग्दुलासहित जिल्ला अस्पताल विजुवार पुग्ने यो मुख्य सडक हो ।
गाउँपालिका-६ स्थित पिपलटारीमा केही घरहरु पहिरोले पुरेको पौडेलले जानकारी दिए । रातीसम्म परेको पानीका कारण क्षतिको यकिन तथ्यांक अझै आइनसकेको उनको भनाई छ ।‘अवरुद्ध सडक सूचारु गर्ने काम सुरु गरेका छौँ’,पौडेलले भने,‘क्षतिको विवरण संकलन हुँदैछ ।’
उनले जिल्लाका अन्य स्थानमा पानी नपरेको तर नौवहिनीमा मात्र ठूलो वर्षात भएको जानकारी दिए । पहिरोले नौवहिनी क्षेत्रको जनजीवन पूर्ण रुपमा अस्तव्यस्त बनेको बाहानेका स्थानीय महेश थापाले जानकारी गराए ।
प्रतिक्रिया दिनुहोस !
