फिदिम : पूर्वी पहाडलाई तराई–मधेससँग जोड्ने दु्रत सडकका रूपमा लिइएको कोसी करिडोरको काम अघि बढेको छ । पाँचथरको याङवरक गाउँपालिकास्थित गणेश चोकबाट सुनसरीको चतारासम्म दुई लेनको सडक निर्माण थालिएको हो ।
गणेश चोकबाट मूलघाट हुँदै विराटनगरसम्मको सडकमा सात प्याकेजमा काम अघि बढेको जनाइएको छ । मध्यपहाडी लोकमार्गको कार्यालयमार्फत यो सडक निर्माणअघि बढाइएको हो । सडकको पाँचथर खण्डमा कामले गति लिएको छ । सुरुमा साढे सात मिटर दुई लेन सडक निर्माण गर्न लागेको जनाइएको छ । ‘करिडोरको पाँचथर खण्डमा काम धमाधम भइरहेको छ’, इन्जिनियर शिवु खत्रीले भने, ‘ट्र्याक खोल्ने र ग्राभेल गर्ने काम एकैसाथ पूरा हुनेछ ।’
१ सय ४५ किलोमिटर दूरी सडकको ट्र्याक खोल्न र ग्राभेल गर्न गत माघमा ठेक्का खोलिएको थियो । पहिलो चरणमा पाँच प्याकेजको मात्रै ठेक्का लागेको थियो । प्रतिप्याकेज ९० करोड रुपैयाँ हाराहारीमा ठेक्का लागेको हो । पाँचथर खण्डमा गणेश चोकबाट सुभाङ खोला र सुभाङ खोलाबाट सिवा दोभानसम्मको कामले गति लिएको छ । गणेश चोकबाट सुभाङ खोलासम्मको प्याकेजमा रसुवा निर्माण कम्पनीले ठेक्का लिएको हो । सुभाङ खोलाबाट सिवा दोभानसम्मको दोस्रो प्याकेजमा श्रेष्ठ÷एपेक्स÷थेगिम जेभीले ठेक्का लिएर काम अघि बढाएको हो । यी दुई प्याकेजमा सात प्रतिशत काम भएको इन्जिनियर खत्रीले सुनाए ।
चतराबाट मूलघाट आएपछि तमोर करिडोरको सडकलाई नै कोसी करिडोरका रूपमा विस्तार गर्न लागेको जनाइएको छ । ‘यसअघिका राजमार्ग सहर, बजार र गाउँबस्तीतिर घुमाउँदै विस्तार गरिएका थिए’, उनले भने, ‘घुमाएका कारण सडकको लम्बाइ बढेको थियो । तर, यो सडक घुमाउरो हँुदैन ।’ अबको डेढ वर्षमा सडक निर्माण सम्पन्न गर्ने लक्ष्य राखिएको उनले सुनाए ।
यहाँबाट पूर्वी पहाडका पाँचथर, ताप्लेजुङ, तेह्रथुम र धनकुटाबाट तराई झर्न र काठमाडौं जान छिटो हुनेछ । यो सडक भएर पाँचथरबाट काठमाडौं पुग्न ४ सय ४० किलोमिटर दूरी पार गर्नुपर्ने जनाइएको छ ।
प्रतिक्रिया दिनुहोस !
