धरान : धरान उपमहानगरपालिका नेतृत्वविहीन भएको छ । उपमहानगरपालिकाका मेयर तारा सुब्बा बिरामी भएको र उपमेयर मञ्जु भण्डारी समेतले कार्यालय छाडेर काठमाडौं गएपछि मंगलबारदेखि धरान उपमहानगरपालिका नेतृत्वविहीन भएको हो। धरान उपमहानगरपालिकाका मेयर तारा सुब्बा फोक्सोमा इन्फेक्शन भएका कारण उपचारका लागि काठमाडौं गएका छन् । उनको ग्राण्डी अस्पतालमा उपचार भइरहेको सुब्बाका पिएसो देबहाङ राईले बताए।
सुब्बा उपचारका लागि काठमाडौं गएपछि उपमेयर भण्डारीलाई कार्यबाहक मेयरको जिम्मेवारी दिइएको थियो । भण्डारीले मंगलबारदेखि कार्यालयमा अनुपस्थित भएपछि उपमहानगरपालिका नेतृत्वविहीन भएको निमित्त प्रमुख गणेश खतिवडाले बताए । उनका अनुसार मेयर र उपमेयर दुवै अनुपस्थित भएपछि कार्यालयबाट हुने नीतिगत निर्णय र अन्य निर्णय गर्न समस्या भएको बताए । उपमहानगरपालिकामा मेयर र उपमेयर दुबैको अनुपस्थित भए पनि दैनिक सिफारिस लगायतका काममा भने अवरोध नपुगेको निमित्त प्रमुख खतिवडाको भनाइ छ ।
धरान उपमहानगरपालिका–१३ का वडाध्यक्ष नेत्र काफ्लेले उपमहानगरपालिकामा कार्यबाहक मेयरसमेत नभएका कारण दैनिक काम कारबाही सञ्चालनमा असर पुगेको बताए । उनले मेयर/उपमेयर अनुपस्थित भएको अवस्थामा कुनै वडाध्यक्षलाई कार्यबाहक मेयरको जिम्मेवारी दिनुपर्ने भए पनि त्यसो नभएका कारण उपमहानगरपालिका जनप्रतिनिधि विहीन हुनु विडम्बना भएको बताए ।
मेयर सुब्बा बिरामी भएर उपचाररत अवस्थामा रहेको बेला उपमेयरले कार्यालय छाडेर हिड्नु गैरजिम्मेवार भएको भन्दै स्थानीय बासिन्दाले आपत्ति जनाएका छन् ।
कार्यालय प्रमुख पनि काठमाडौं
धरान उपमहानगरपालिका प्रमुख प्रशासकीय अधिकृत सुमन घिमिरे र वरिष्ठ प्रशासकीय अधिकृत खगेन्द्र खतिवडासमेत काठमाडौं गएका छन् । उनीहरु कार्यालयको काममा नभएर व्यक्तिगत कामका लागि बिदा मिलाएर काठमाडौं गएको उपमहानगरपालिका स्रोतले जानकारी दिएको छ । जनप्रतिनिधि अनुपस्थित भएको अवस्थामा माथिल्लो तहका कर्मचारी समेत बिदामा बसेपछि काम लथालिङ अवस्थामा पुगेको स्थानिय विष्णु चौलागाईले बताए ।
प्रतिक्रिया दिनुहोस !
