काठमाडौं : कांग्रेस सभापति शेरबहादुर देउवाले मंगलबार पार्टी पदाधिकारीसहित शीर्ष नेताहरूसँग छलफल गरेका छन् । संसद्मा कांग्रेसले सशक्त भूमिका निर्वाह गर्न नसकेको भन्दै पार्टी भित्र र बाहिर आलोचना हुन थालेपछि देउवाले कांग्रेस पदाधिकारीसहित शीर्ष नेतासँग पार्टी रणनीति तय गर्न छलफल गरेका हुन् । देउवाले बुधवार संसदीय दलको बैठक समेत डाकेका छन् ।
संसदीय दलको बैठकअघि मंगलबार साँझ पार्टीका शीर्ष नेतासँग आफ्नै निवास बुढानिलकण्ठमा देउवाले ४ घण्टा भन्दा बढी अनौपचारिक छलफल गरेका हुन् ।
कांग्रेस महासमिति बैठकअघि गठन गर्नुपर्ने विधान मस्यौदा समितिसहित पार्टीका विभाग गठन गर्नुपर्नै विभाग साथै संसद्मा पार्टीलाई कसरी प्रस्तुत गराउनु भन्नेमा देउवाले शीर्ष नेतासँग छलफल गरेको प्रवक्ता विश्वपकाश शर्माले जानकारी दिए ।
बैठकमा सभापति देउवाले नेताहरूलाई पार्टीदेखि सरकारसँग कसरी प्रस्तुत हुने भन्ने बारेमा खुला रूपमा विचार राख्न भनेको बैठकमा सहभागी एक नेताले जानकारी दिए ।
प्रवक्ता शर्माका अनुसार प्रतिपक्षी दलले सभामुख र उपसभामुखमध्ये एक पद पाउनु कुरालाई बलियो गरी उठाउन देउवालाई नेताहरूले सुझाएका छन् । त्यसै गरी सरकारले ल्याउन लागेको शिक्षा विधेयकदेखि अन्य सन्दर्भमा समेत कडा भएर प्रस्तुत हुन देउवालाई सुझाएको प्रवक्ता शर्माले बताए । छलफलमा बरिष्ठ नेता रामचन्द्र पौडेल, उपसभापति विमलेन्द्र निधि, महामन्त्रीद्वय डा.शशांक कोइराला र पूर्णबहादुर खड्का, कोषाध्यक्ष सीतादेवी यादव, सहमहामन्त्री डा.प्रकाशशरण महत, संसदीय दलका उपनेता विजयकुमार गच्छदार, पूर्वमहामन्त्रीद्वय कृष्णप्रसाद सिटौला र प्रकाशमान सिंह, पूर्वसहमहामन्त्रीद्वय अर्जुननरसिंह केसी र डा.रामशरण महत, पूर्वकोषाध्यक्ष चित्रलेखा यादव र प्रवक्ता विश्वप्रकाश शर्मासहित १८ जना नेता सहभागी थिए ।
बैठक समसामयिक राजनीति र पार्टीको आन्तरिक विषयमा केन्द्रित रहेको बैठकपछि नेताहरूले सञ्चारकर्मीलाई प्रतिक्रिया दिए । ‘अहिलेको राजनीतिक अवस्था, लोकतन्त्र र कांग्रेस सामू देखिएका चुनौतिका विषयमा छलफल भएको थियोे’, सहमहामन्त्री डा.प्रकाशशरण महतले अन्नपूर्णसँग भने, ‘अनौपचारिक भएकोले नेताहरूबीच आन्तरिक, सहमति र एकताका लागि समेत छलफल भयो ।’
गच्छदारसँग पार्टी एकीकरण गर्दाका भेला भएका सम्झौतालाई कसरी कार्यन्वयन गर्ने भन्ने बारेमा समेत छलफल भएको नेताहरूले बताएका छन् ।
‘सभपाति देउवाले नेकपा नेतृत्वतको सरकारले राज्यका हरेक निकायमा गर्न थालेको हस्तक्षेप, न्यायालय र पे्रसमाथिको हस्तक्षेपकाविरुद्ध कसरी अघि बढ्ने र पार्टीलाई कसरी अगाडि बढाउने बारेमा नेताहरूसँग सल्लाह मागेकोे’ बैठकमा सहभागी कांग्रेसका एक नेताहरूले जानकारी दिए ।
जिल्ला सभापतिको भेला अगावै देउवा विधान मस्यौदा समिति गठन गर्न खाजे पनि वरिष्ठ नेता पौडेलले आफ्ना तर्फबाट समितिमा बस्ने नेताको नाम नपठाउँदा समिति गठन हुन सकेको छैन ।
प्रतिक्रिया दिनुहोस !
