भोजपुर : अविरल वर्षाका कारण जिल्लाका अधिकांश ग्रामीण भेगका कच्ची सडक अवरुद्ध बनेका छन् । दुई दर्जनभन्दा बढी ग्रामीण सडकमा पहिरो झर्न थालेपछि यात्रुलाई आउजाउ गर्न सास्ती भएको छ ।
आमचोक गाउँपालिका–१० पाङ्चा राङ्चास्थित बालंखा–रानीटार सडक २०–२२ मिटर उचाइको पहिरो खसेपछि यातायात अवरुद्ध भएको छ । ५ र १० मिटर दूरीमा पहिरो झरेपछि एस्काभेटर लगाएर हटाउने काम भइरहेको जनाइएको छ ।
हतुवागढी गाउँपालिका–९ हसनपुर साफिङटारस्थित घोडेटार–मचुवाटार सडकमा मंगलबार बिहान पहिरो झरेपछि यातायात ठप्प भएको छ । पहिरो हटाउन प्रहरी चौकी हसनपुरबाट टोली खटाइएको जिल्ला प्रहरी कार्यालय भोजपुरले जनाएको छ ।
सोमबार राति साल्पासिलिछो गाउँपालिका–२ कुलुङ देउरालीमा उत्तरी कुलुङबाट छिमेकी जिल्ला संखुवासभाको ताम्लुक जोड्ने सडकमा पहिरो जाँदा स्थानीय लीलामाया विश्वकर्माको घर जोखिममा परेको प्रहरीले जनाएको छ । पहिरो खसेको स्थानबाट १६ मिटर दूरीमा रहेको घरका परिवारलाई स्थानीय विमला विश्वकर्माको घरमा सुरक्षितका साथ राखिएको जिल्ला प्रहरी कार्यालय भोजपुरका प्रहरी निरीक्षक चरित्रविक्रम कार्कीले जानकारी दिए ।
भोजपुर नगरपालिका–७, खप्परेभीर बस्ने चन्द्रबहादुर तामाङको सुँगुर खोर पहिराले पुँरिएको छ । एउटा सुँगुर पुरिएर मरेको प्रहरीले जनाएको छ । छिमेकी जिल्ला खोटाङ जोडिने ४२ किलोमिटर दूरीको पुष्पलाल मध्यपहाडी लोकमार्ग सडक हिलाम्मे बनेपछि ठूला यातायातका साधन चल्न सकेका छैनन् ।
प्रतिक्रिया दिनुहोस !
