वीरगन्ज : मजदुर र कर्मचारी असुरक्षाको कारण देखाउँदै काम छाडेर हिँडेपछि पर्सामा हुलाकी सडक निर्माण अन्योलमा परेको छ ।
कमसल निर्माण सामग्री प्रयोग गरिएको भन्दै ठोरी गाउँपालिका–४ विजयबस्तीका स्थानीयले विरोध गरेपछि शनिबार रोकिएको सडक निर्माण शुक्रबारदेखि नियमित गर्ने सहमति भएको थियो । तर, ठोरी–४ गोपीबस्तीका युवाले बिहीबार बेलुका आक्रमण गरी घाइते बनाएपछि कालिका बानियाँ जेभी कन्स्ट्रक्सनका मजदुरसहित काम छाडेर हिँडेका हुन् । स्थानीयको आक्रमणबाट टिपर चालक मकवानपुर भीमफेदी गाउँपालिका–३ घर भएका जब्बरबहादुर लामा घाइते भएका छन् । विजयबस्ती स्वास्थ्य चौकीमा उपचार हुन नसकेपछि लामालाई वीरगन्जको नेसनल मेडिकल कलेजमा भर्ना गरिएको छ ।
ठेकेदार कम्पनीका मजदुर र चालक बस्दै आएको क्याम्प पछाडि रहेको एक होटलमा बिहीबार बेलुकी लामालाई स्थानीय युवाले फलामको रड प्रहार गरेको जनाइएको छ । आक्रमणमा संलग्न रहेको भन्दै प्रहरीले स्थानीय अमृत बम्जन, मुगा लामा र विक्रम पाख्रिनलाई पक्राउ गरेको छ । तीनै जनाविरुद्ध सार्वजनिक अपराध मुद्दा दर्ता गरी कारबाही अघि बढाइएको पर्साका प्रहरी नायब उपरीक्षक सत्यनारायण थापाले जानकारी दिए ।
अघिल्लो शुक्रबार विजयबस्तीवासीले कमसल निर्माण सामग्री प्रयोग गरिएको भन्दै कम्पनीका प्रोजेक्ट म्यानेजर मनोज सिग्देल सवार गाडीका चालक राजकुमार बाइवामाथि हातपात गरेका थिए । टिपर चालकलाई गोपीबस्तीका युवाले आक्रमण गरी घाइते बनाएपछि इन्जिनियर, ओभरसियर, चालक र मजदुर काम छाडेर हिँडेको सिग्देलले बताए । उनका अनुसार १५ टिपर र एउटा जेसीभी लिएर चालक हेटौंडा फर्किएकाले तत्काल काम नियमित गर्ने सम्भावना छैन । ‘मजदुरमाथि पटक–पटक आक्रमण हुन थालेपछि असुरक्षित बनेको भन्दै उनीहरू काम नै छाडेर हिँडेका छन्’, उनले भने, ‘मैले सम्झाइबुझाइ गर्दा पनि उनीहरूले मानेनन् । जबर्जस्ती काममा लगाउन सक्ने अवस्था छैन ।’ गोपीबस्तीस्थित क्याम्पमा आफू र एक जना भान्से मात्र रहेको उनले सुनाए ।
उनका अनुसार एक सातादेखि काम रोकिँदा कम्पनीलाई दैनिक १५ लाख रुपैयाँ नोक्सानी भइरहेको छ । ‘एक दिन काम रोकिँदा झन्डै १५ लाखको घाटा हुन्छ’, उनले भने, ‘काम नभए पनि मजदुर, कर्मचारीलाई तलब, भत्ता दिनै पर्छ, रासनमा खर्च लाग्छ, अन्यत्रबाट ल्याइएका सवारी साधन र उपकरणको भाडा तिर्नै पर्छ ।’
विजयबस्तीका स्थानीयले गत शनिबारदेखि काम रोकेका थिए । बिहीबार भारतीय कन्सल्टेन्ट कम्पनीका इन्जिनियर महम्मद अतुल्लाह नेतृत्वको प्राविधिक टोलीले हुलाकी सडकको अवलोकन गरेको थियो । अतुल्लाहले स्थानीयको मागबमोजिम सडकमा माटोको मात्रा वृद्धि गरी उचाइ बढाउन र कल्भर्टको पुनर्निर्माणका लागि फेरि सर्भे गरी काम गर्न सकिने बताएका थिए । त्यसपछि शुक्रबारदेखि काम गर्न दिन स्थानीय सहमत भएका थिए ।
- आक्रमणपछि काम छाडेर हिँडे मजदुर
- तीन आक्रमणकारीविरुद्ध सार्वजनिक अपराध मुद्दा
- काम रोकिँदा कम्पनीलाई दैनिक १५ लाख घाटा
- पर्साको ठोरी गाउँमा एक सातादेखि काम अवरुद्ध
पर्साका प्रमुख जिल्ला अधिकारी लोकनाथ पौडेलले बिहीबार बेलुकी भएको घटनाबारे प्रहरीमार्फत जानकारी लिने बताए । सडक निर्माणमा खटिने ठेकेदार कम्पनीका मजदुर, कर्मचारी र चालकको सुरक्षामा कुनै कसर बाँकी नराख्ने उनको भनाइ छ । ‘सुरक्षा नपाएकै कारणले काम रोक्ने अवस्था आउँदैन’, उनले भने, ‘हुलाकी सडकको काममा अवरोध नहोस् भनेर सुरक्षा निकाय जुन बेला पनि जस्तोसुकै सुरक्षा दिन तयार छ ।’
जिराभवानी गाउँपालिकाको सेढवास्थित चमरी टोलबाट ठोरी गाउँपालिकाको चौतारसम्म ३ किलोमिटर सडकको ठेक्का कालिका बानियाँले १ अर्ब २ करोड ९६ लाख रुपैयाँमा सकारेको थियो ।
प्रतिक्रिया दिनुहोस !
