बर्दिबास : जातीय विभेदको सिकार भएकी महोत्तरीको बर्दिबास—४ भब्सीकी बुद्धमाया विश्वकर्मालाई थप उपचारका लागि काठमाडौं लगिएको छ ।
अदालतले न्याय दिए पनि पीडकको पक्षमा रहेको समाजले दबाब बढाएपछि उनले विष सेवन गरी आत्महत्या प्रयास गरेकी थिइन् । मुटु र आन्द्रामा समस्या देखिएपछि बुद्धमायालाई शनिबार काठमाडौंको ग्रिन सिटी अस्पताल लगिएको हो । विष सेवनपछि बेहोस भएकी उनलाई बुधबार बर्दिबासस्थित शुभस्वस्तिक अस्पतालमा भर्ना गरिएको थियो ।
बर्दिबासका मेयर विदुरकुमार कार्कीले नगरपालिकाका तर्फबाट एम्बुलेन्स उपलब्ध गराएर उनलाई काठमाडौं पठाइएको बताए । ‘विष सेवनको उपचार लगभग पूरा भइसकेको छ’, डा. अभिनास यादवले भने, ‘मुटु र आन्द्रामा पोल्ने असर देखिएको छ ।’
उनको स्वास्थ्य अवस्था निकै कमजोर भएको छोरी मनीषाले बताइन् । पानी छोएको भन्दै बुद्धमाया र मनीषामाथि दुव्र्यवहार गर्नेलाई जिल्ला अदालत महोत्तरीले ६ महिना कैद, जरिवाना र ५० हजार रुपैयाँ क्षतिपूर्ति भराउने फैसला सुनाएको थियो । त्यसपछि सामाजिक बहिष्करणका कारण उनले आत्महत्या प्रयास गरेको जनाइएको छ ।
पानी छोएको निहुँमा वैशाख १५ गते साँझ छिमेकी कमला गिरी र उनका भान्जा रामबाबु दाहालले कुटपिट गरेका थिए ।
प्रतिक्रिया दिनुहोस !
