काठमाडौँ: डिस मिडिया नेटवर्क लिमिटेडको व्यवस्थापनमा सिम्पल मिडिया नेटवर्क प्रालि (सिम टिभी) आबद्ध भएको छ । शनिवार बसेको दुई कम्पनीका सञ्चालक समितिको संयुक्त वैंठकले सिम टिभीलाई डिस मिडिया नेटवर्क लिमिटेडले किन्ने गरी खरिद सम्झौता भएको हो ।
यस खरिद सम्झौता अन्तर्गतको सेयर खरिद निकट भविष्यमै सम्पन्न हुने उल्लेख गरिएको छ । यसका साथै सिम टिभीको व्यवस्थापनको सम्पूर्ण जिम्मा डिस मिडिया नेटवर्क लिमिटेडले आजैका मितिबाट लिने भएको छ ।
सन् २००९ मा स्थापना भएको डिश मिडिया नेटवर्क लिमिटेड नेपालको पे टिभी उद्योगमा काम गरिरहेको सबैभन्दा सफल र ठुलो कम्पनी हो । २०७४ असार १८ गते बाट यो कम्पनी पब्लिक कम्पनीको रूपमा रूपान्तरण भइसकेको छ । निकट भविष्यमा सर्वसाधारणका लागि सेयरसमेत निष्कासन गर्ने तयारीमा गरिरहेको छ ।
सिम टिभीका प्रमुख कार्यकारी अधिकृत ज्याकी शाहले डिस मिडिया नेटवर्कले सिम टिभीको खरिदपछि टिभी हेराइको गुणस्तरीय अनुभव अझ धेरै ग्राहकहरू तथा आबद्ध स्थानीय केवल अपरेटरको पहुँचमा पुग्ने बताएका छन् ।
त्यस्तै नयाँ प्रविधिको प्रयोग, आक्रामक बजार विस्तार, पूर्ण डिजिटलाइजेसन र चुस्त व्यवस्थापनमा अझ जोड दिएर ग्राहकलाई गुणस्तरिय सेवा प्रदान गर्ने डिश मिडिया नेटवर्कले जनाएको छ ।
प्रतिक्रिया दिनुहोस !
