भोजपुर : भोजपुरका नौवटै स्थानीय तहमा बैंक खुले पनि धेरैजसोले कारोबार सुरु गरेका छैनन् । जिल्ला सदरमुकामकेन्द्रित बैंकले आआफ्ना शाखा स्थानीय तहमा विस्तार गर्न ढिलाइ गरेकाले गत आर्थिक वर्ष कारोबार हुन नसकेको हो ।
आर्थिक वर्ष सकिन एक महिनाअघि मात्र बैंकका शाखा खुलेकाले कारोबार गर्न गाह्रो भएको साल्पासिलोछो गाउँपालिकाका प्रमुख प्रशासकीय अधिकृत प्रवीण कोइरालाले बताए । चालू आव भने गाउँपालिका केन्द्र चौकीडाँडामा रहेको नेपाल बंगलादेश बैंकको शाखाबाट कारोबार गरिने उनको भनाइ छ ।
षडानन्द नगरपालिका केन्द्र दिङ्ला बजारमा राष्ट्रिय वाणिज्य बैंक, अरुण गाउँपालिका प्याउलीमा सेन्चुरी कमर्सियल, पौवादुङ्माको तिवारीभञ्जाङमा नेपाल इन्भेस्टमेन्ट, टेम्के मैयुङको अन्नपूर्णमा माछापुच्छ«े, रामप्रसाद राईको बैकुण्ठेमा एनआईसी एसिया, हतुवागढीको घोरेटार बजारमा प्रभु र आमचोकको बालंखामा सिद्धार्थ बैंक खुलेका छन् । बैंकका शाखा ढिलो खुलेका कारण गाउँपालिकाका करोडौंको योजनाका आर्थिक कारोबार अन्य जिल्ला सदरमुकामबाटै गर्नुपरेको जनाइएको छ । आमचोक गाउँपालिकाको सम्पूर्ण आर्थिक कारोबार सिद्धार्थ बैंकबाट भइरहे पनि अझै चेक बोकेर सदरमुकाम धाउनुपर्ने बाध्यता रहेको सहलेखापाल केशव सोराली मगरले सुनाए ।
‘गाउँमै बैंकिङ सेवा पाएपछि स्थानीयलाई सदरमुकाम धाउनुपर्ने बाध्यता हटेको छ’, उनले भने, ‘तर, अझै कतिपय कार्यालय संस्थागत कारोबारका लागि बैंकमा सेवा नहुँदा चेक बोकेर सदरमुकाम धाउनुपरेकै छ ।’
अधिकांश गाउँपालिकामा पुगेका बैंकको अघिल्लो आवका कारोबार शून्यप्रायः रहेको जनाइएको छ । भोजपुर नगरपालिका, षडानन्द नगरपालिका र आमचोक गाउँपालिकाबाहेक ६ वटा स्थानीय तहका नागरिकले भने गाउँपालिकाको चेक बोकेर सदरमुकाम धाउने गरेका छन् ।
‘गाउँपालिका केन्द्रमा बैंक पुगे पनि गाउँपालिकाले कारोबार थालेको छैन’, टेम्के मैयुङ–३, अन्नपूर्णका डम्बर राईले भने, ‘गाउँ गाउँमा सिंहदरबार भनियो बैंकको चेक साट्न पाँच कोष पर सदरमुकाम नै पुग्नुपरेको छ ।’
पौवादुङ्मा तिवारीभञ्ज्याङमा नेपाल इन्भेस्टमेन्ट बैंकले गाउँपालिका केन्द्रभन्दा टाढा आफ्नो शाखा स्थापना गरेको छ । गाउँपालिका केन्द्र च्यांगे्रमा बैंक शाखा स्थापना नभएको भन्दै गाउँपालिकाले कारोबार गर्न नमानिरहेको जनाइएको छ । गाउँपालिकालाई लक्ष्य गरी बैंक खोलिए पनि कारोबार भने हुन नसकेको हो । च्यांग्रेमा अर्को बैंक ल्याउने तयारी रहेको गाउँपालिका अध्यक्ष किरण राईले बताए ।
प्रतिक्रिया दिनुहोस !
