विप्लवको बन्द : बालुवा बोकेको ट्रक जलाइयो, अन्य दुईमा तोडफोड
साउन २९, २०७५ मंगलबार १०:३४:०
नुवाकोट: नेत्रविक्रम चन्द विप्लव नेतृत्वको नेकपाले गरेको बन्दमा मंगलबार नुसवाकोटमा गाडीमा तोडफोड र आगजनी भएको छ । एउटा गाडीमा आगजनी र दुईवटा गाडीमा तोडफोड हुँदा लाखौंको क्षति भएको छ ।
दलका प्रवक्ता खड्गवहादुर विश्वकर्मा प्रकाण्ड पक्राउ परेको विरोधमा विप्लवले गरेको वन्दका क्रममा सदरमुकाम विदुरदेखि ३० किलोमिटर पुर्वस्थित शिवपुरी गाउँपालिका–८ बोहरे खोलामा मिनीट्रक जलाइएको छ ।
छहरे बुडीखोलाबाट बालुबा बोकेर काठमाडौँतर्फ जाँदै गरेको ट्रकमा विप्लवका ७/८ जनाको समूहले आगजनी र दुईवटामा तोडफोड गरेको जिल्ला प्रहरी कार्यालय नुवाकोटले जनाएको छ ।
विप्लवको समूहले सडकमार्गमा गुडिरहेको बा४ख ८५१६ नम्बरको मिनीट्रकको अगाडिको भागमा पेट्रोल छर्केर आगजनी गरेको चालकले बताएका छन् । आगजनीका क्रममा चालक तथा विप्लवका कार्यकर्ताबीच झडपसमेत भएको स्थानीयवासीले बताएका छन् ।
विप्लवका कार्यकर्ताले बा५ख र ३ बा५ख २१३२ नम्बरको मिनीट्रको शिशा ढुङ्गाले हानेर फोडेको स्थानीयले बताएका छन् । घटनामा संलग्न विप्लवका कार्यकर्ता र गाडीका चालकबीच केहीबेर झडपसमेत भएको छ ।
घटनापछि नारा लगाउँदै विप्लवका कार्यकर्ता भागेका थिए । घटनालगत्तै अस्थायी प्रहरी पोष्ट छहरेबाट प्रहरी खटिएको छ। आगजनी र तोडफोडमा संलग्नहरुको खोजी भइरहेकोसमेत जिल्ला प्रहरी कार्यालय नुवाकोटले जनाएको छ ।
प्रतिक्रिया दिनुहोस !
