कालिकोट : रारा ताल र पदमार्गमा पछिल्लो समय प्रदुषण बढ्न थालेपछि यसको न्युनिकरण गर्न भन्दै सरसफाइ थालिएको छ ।
मान्म बजारका एक व्यवसायीको नेतृत्वमा ४० युवा मिलेर कालिकोटदेखि रारा पदमार्ग सरसफाइ अभियान सुरु गरेका हुन् । होटल हिलसाईडका संचालक धर्मेन्द्र शाहीको नेतृत्वमा हालै यहाँका ४० युवा यस अभियानमा सक्रिय छन् ।
रारा घुम्न आउनेहरुको संख्या पछिल्लो समय बढ्न थालेपछि सफाइमा ध्यान दिएको उनीहरुको भनाइ छ । शनिबार मान्ममा पत्रकार सम्मेलन गरी राराको मौलिकता संरक्षणका साथै राराको पहिचान कायम राख्न रारा पदमार्ग सरसफाइ अभियान सुरु गरिएको व्यवसायी शाहीले बताए ।
रारा राष्ट्रिय निकुञ्जको सुरुवातीसँग हिँडेर जाने करिव ४ किलोमिटर पैदल मार्गमा प्लाष्टिकजन्य सामान तथा कुहिने– नकुहिने सामान उठाएर व्यवस्थापन गर्ने बताए ।
शाहीले भने ‘राराकै कारण कालिकोटका होटलहरुमा व्यपार वृद्धि भएको छ । रारा समग्र कर्णालीबासीको समृद्धिको आधार हो । त्यसैले हामी सफाइ अभियानमा लागेका हौँ ।’
सफाइ अभियान अन्तरगत पदमार्गमा ३० वटा एक सय लिटरका डस्टबीन राखिने बताइएको छ । साथै रारा जानका लागि दिशा र दूरीबारे पनि सूचना बाटोमा राखिने अभियन्ताहरुले बताएका छन् । यस्तो अभियानलाई दलका स्थानीय नेताहरुले प्रशंसा गरेका छन् ।
प्रतिक्रिया दिनुहोस !
