नुवाकोट मिनीट्रक दुर्घटनामा मृत्यु हुनेको संख्या २० पुग्यो

नुवाकोट : जिल्लाको उत्तरपूर्वी भेग  दुप्चेश्वर गाउँपालिकास्थित घ्याङफेदीको घ्याङडाँंडामा शुक्रबार बेलुका भएको मिनिट्रक दुर्घटनामा ज्यान गुमाउनेको संख्या २० पुगेको छ । १५ जना घाइतेको विभिन्न अस्पतालमा उपचार भइरहेको  बताइएको छ । 

शुक्रबार रातिसम्म १८ जनाको मत्यु भएकोमा उपचारका क्रममा शनिबार बिहान थप दुई जनाको मृत्यु भएको  दुप्चेश्वर गाउँपालिकाका अध्यक्ष योविन्द्रसिंह तामाङले जानकारी दिएका छन् । 

मृत्यु भएका मध्ये १७ जना पुरुष र ३ महिला रहेका छन् ।  हालसम्म ५ जनाको सनाखत भएको  छ । सनाखत भएकामा  शिखरबेँसीका १६ वर्षीय रितेश पण्डित, घ्याङफेदी सिसिपुका ३५ वर्षीय रिवल तामाङ, ४० वर्षीय आइत तामाङ रहेका छन् । सनाखत भएका अन्य दुई जनामा सिसीपुकै शुक्रमान तामाङ र सेनाम लामा रहेको गाउँपालिका अध्यक्ष तामाङले बताए । 

शनिबार बिहानैदेखि थप उद्धार कार्य जारी भइरहेको छ । दुर्घटनास्थल अप्ठेरो भीर रहेको र अत्याधिक चिसोका कारण उद्धारमा कठिनाई भएको तामाङले बताए । 

• अपडेट : मिनीट्रक भीरमा खस्दा १८ को मृत्यु, तीनजनाको सनाखत
• घेवामा सहभागी भएर फर्किदा दुर्घटना : १६ को मृत्यु, २० घाइते (अपडेट)