डोटी : केआइसिंह गाउँपालिकाले ४१ लाख रुपैयाँमा जेसिवी कम्पनीको नयाँ व्याकहोल लोडर (चक्कावाला डोजर) किन्यो । गाउँगाउँ र बस्तीबस्तीमा सडक पुर्याउने भन्दै गाउँपालिकाले डोजर किनेको हो ।
यस्तै सायल गाउँपालिकाले एक करोड २९ लाखमा लुसान कम्पनीको डोजर किन्यो ।त्यस गाउँपालिकाले सडक बनाउन डोजर प्रयोग गरी डाँडा भत्काउन थालेको छ । बडीकेदार गाउँपालिकाले पनि एक करोड २३ लाखमा लुसान कम्पनीकै डोजर किनेको छ ।त्यस गाउँपालिकाले पाँचै वडामा सडक पुर्याउने योजना बनाएको छ ।
दीपायल सिलगढी नगरपालिकाले यसअघि नै डोजर किनिसकेको छ । नगरपालिकाले नगर क्षेत्रमा सडक निर्माण गर्नाका साथै डोजर भाडामा समेत दिने गरेको छ । स्थानीय तहले मात्रै होइन जिल्लामा विभिन्न निर्माण व्यवसायीले सडक निर्माण गर्न डाँडा भत्काउन थालेका छन् । व्यवसायीबीच निजी र भाडामा मेसिन भित्र्याउने होडबाजी चलेको छ ।
उपभोक्ता समितिले डोजरको प्रतिघण्टा छ हजार ५०० देखि नौ हजारसम्म तथा चक्कावाला डोजरको प्रतिघण्टा दुई हजार ५०० देखि चार हजार भाडा तिर्दै सडक निर्माण गर्ने गरेका छन् ।
जिल्लामा कम्तीमा ४२ डोजर सडक निर्माण गर्न प्रयोग गरिँदै आएको बोगटान गाउँपालिका सिमिचौरका तेजबहादुर विष्टले बताए । 'सडक काट्ने नाममा गाउँगाउँमा डोजर भित्रिएका छन्, डाँडाकाँडा सखाप हुने भए', उनले भने ।
एउटै सडकमा एक करोडभन्दा बढी खर्च भइरहेको छ । वातावरणीय प्रभाव मूल्याङ्कन गरिएको पाइँदैन । प्रमुख जिल्ला अधिकारी यादव सुवेदी नाप नक्साबिना काटिएका सडकले दुर्घटना निम्त्याउने बताउँछन् ।
'सडक निर्माण गर्दा इञ्जिनीयरको सल्लाह लिनुपर्छ,' उनले भने । विकास निर्माण गर्दा वातावरणीय प्रभाव मूल्याङ्कन अनिवार्य गर्नुपर्ने उनेले बताए । सेक्टर वन कार्यालयका सहायक वन अधिकृत शुरेशचन्द्र डिसीले खुटिया-बिपीनगर सडकबाहेक अन्य सडक योजनाको वातावरणीय प्रभाव मूल्याङ्कन नभएको बताए ।
'वातावरणीय प्रभाव मूल्याङ्कन गर्नुपर्छ । राजनीतिक दलका नेता र जनप्रतिनिधिले त्यो कुरा मान्नु हुन्न', उनी भन्छन । केआइसिंह गाउँपालिकाका अध्यक्ष लोकेन्द्रबहादुर शाही भन्छन्, 'केही प्रक्रिया नपुगेको होला । तर हामी जनप्रतिनिधिलाई जनताको दबाब पनि खपिनसक्नु छ, त्यसैले सडक काटिरहेका छौँ ।'
खटिया-दिपायललाई राष्ट्रिय राजमार्ग बनाउन माग
सुदूरपश्चिमको खुटिया—दिपायल हुँदै बझाङ्ङको मानसरोवर जोड्ने सडकलाई राष्ट्रिय राजमार्ग बनाउने प्रयास थालिएको छ ।
डोटीबाट निर्वाचित सांसद प्रेमबहादुर आलेमगरसहितको टोलीलेले भौतिक योजना तथा निर्माणमन्त्री रघुवीर महासेठलाई उक्त सडकलाई राष्ट्रिय राजमार्ग बनाउनका लागि मन्त्रिपरिषद्को बैठकमा पेश गर्न आग्रह गरेका हुन् ।
उक्त सडक राष्ट्रिय राजमार्ग बनाउन मन्त्री परिषद्को बैठकमा पेश गर्ने मन्त्री महासेठले प्रतिबद्धता जनाएका सांसद आलेमगरले जानकारी दिए । सांसद आलेमगरले उक्त सडकलाई जसरी पनि मानसरोवरसम्म जोड्ने बताए ।
प्रतिक्रिया दिनुहोस !
