कालिकोट : कालिकोट जिल्लामा कार्यरत २ सय ४४ वटा गैरसरकारी संस्थाहरु खारेजीको सूचीमा परेका छन् ।
दर्ता भएर पनि वर्षौँसम्म नविकरण नगरेका गैरसरकारी संस्थाहरु खारेजीको लागि प्रशासनले सूचीकृत गरेको हो । सामाजिक सेवा र विकास गर्ने उद्देश्यका साथ दर्ता भएका ५ सय ४३ ओटा संस्थामध्ये नवीकरणका लागि बारम्बार ताकेता गर्दा पनि तोकिएको समयमा नविकरण नगरेका २ सय ४४ संस्था खारेजीको सूचीमा परेको प्रमूख जिल्ला अधिकारी चन्द्रबहादुर कार्कीले जानकारी दिए ।
प्रशासनले तीन वर्षअघि नै संस्थाहरुलाई नविकरण गर्न ३५ दिने सूचना जारी गरेको थियो । त्यस अवधिमा पनि नविकरण नगर्ने गैससहरु खारेज हुने भएका हुन् । यसरी नविकरण नगरेर खारेजीमा पर्ने अधिकांश संस्थाहरु वर्षौँँदेखि जिल्लामा कार्यरत प्रतिष्ठित व्यक्तिबाटै सञ्चालित छन् ।
जिल्लामा दर्ता भएका ५ सय ४३ गैरसरकारी संस्था मध्ये हालसम्म १ सय ६९ वटाले मात्र नविकरण गर्दै आएको जिल्ला प्रशासनले जनाएको छ । गत आर्थिक वर्षदेखि हालसम्म नयाँ दर्ता भएका १ सय ३० गैरसरकारी संस्थाहरुको बारेमा अद्यावधि गर्न बाँकी नै छ ।
प्रमुख जिल्ला अधिकारी कार्कीका अनुसार बारम्बार नविकरणमा ताकेता गर्दा पनि अधिकांश गैरसरकारी संस्थाका संचालक सम्पर्कमा आएका छैनन् । लगातार तीन वर्ष भन्दा बढी समय नविकरण गर्न नआएका २ सय ४४ संस्थालाई खारेज गरिन उनले बताए ।
प्रतिक्रिया दिनुहोस !
