दाङ दुर्घटना अपडेट : ६ घाइते डिस्चार्ज, ५ जना आईसियूमा
दाङ : शुक्रबार दाङको तुलसीपुरस्थित राम्रीमा भएको बस दुर्घटनामा परी घाइते भएका सहिद कृष्णसेन इच्छुक बहुप्राविधिक शिक्षालयका १४ विद्यार्थीमध्ये ६ जना डिस्चार्ज भएका छन् । घाइते ५ जनालाई आइसियूमा राखिएको छ ।
अन्य दुईजना वीर अस्पतालको ट्रमा सेन्टरकै इमर्जेन्सीमा राखिएको छ । घाइते जुम्लाकी हिमाली हमालको कोहलपुरबाटै डिस्चार्ज गरिएको थियो भने काठमाडौंमा थप पाँचजना डिस्चार्ज भएका छन् ।
डिस्चार्ज हुनेहरुमा अछाम मंगलसेनका विक्रम भण्डारी, जुम्ला चन्दननाथका कुसेन्द्र खत्री, रुकुम त्रिवेणीका प्रेमबहादुर खड्का, टीकापुर कैलालीकी समीक्षा रोकाय र चन्दननाथ जुम्लाकी वर्षा रोकाया छन् ।
उनीहरुमध्ये विक्रम भण्डारी आफन्तसँग बसेको र बाँकी चारजनालाई सिटिइभिटीको प्रशिक्षण केन्द्रको गेष्ट हाउसमा राखिएको शिक्षामन्त्रीका प्रमुख सल्लाहकार जीवन गौतमले जानकारी दिए ।
बाँकी घाइतेमध्ये जुम्ला चन्दननाथका जीवन भण्डारी, रुकुम सानीभेरीकी रेजिना पुन, रोल्पा परिवर्तन गाउँपालिकाका प्रकाश ओली र दाङ बंगलाचुली गाउँपालिका स्यूजाकी मेनुका रिजाललाई ट्रमा सेन्टरको आइसियूमा राखिएको छ ।
अछाम मंगलसेनका युवराज ढुंगानालाई शिक्षण अस्पताल महाराजगञ्जको आइसियूमा राखिएको छ । यस्तै रुकुम सानीभेरीका राजन डाँगी र अछाम मंगलसेनका भद्र विष्टलाई ट्रमा सेन्टरको इमरजेन्सीमा राखेर उपचार भइरहेको गौतमले जानकारी दिए । अर्का घाइते दाङको सञ्जय खनालको कोहलपुर अस्पतालमा उपचार भइरहेको छ ।
दाङको शहिद कृष्णसेन इच्छुक बहुप्राविधिक शिक्षालयका शिक्षक विद्यार्थी चढेको गाडी राम्रीमा दुर्घटना हुँदा २३ जनाको मृत्यु भएको थियो भने १४ जना घाइते भएका थिए ।