भारतबाट ४० नेपाली महिलाको उद्धार
काठमाडौं : गैरकानूनी रुपमा वैदेशिक रोजगारीका लागि तेस्रो मुलुक जान हिँडेका ४० नेपाली महिलालाई भारतका विभिन्न स्थानबाट उद्धार गरी नेपाल फर्काइएको छ। दलाल र साथीभाइको प्रलोभनमा राम्रो आय हुने कामको खोजीमा तेस्रो देश जाने तयारीमा रहेको उनीहरु झण्डै एक महिनादेखि भारतीय प्रहरीको नियन्त्रणमा थिए।
नयाँ दिल्लीस्थित नेपाली दूतावास र 'माइती भारत' का अध्यक्ष बालकृष्ण पाण्डेको सहयोगमा उनीहरुलाई भारतीय प्रहरीको नियन्त्रणबाट मुक्त गरी नेपाल फर्काइएको अध्यक्ष पाण्डेले जानकारी दिए।
४० महिलामध्ये १३ लाई मंगलबार र २७ लाई तीन दिनअघि नेपाल फर्काइएको उनले जानकारी दिए।नेपाल भारत जनसम्पर्क समितिका अध्यक्ष पाण्डेको सहयोगमा सबै महिलालाई विमानबाट नेपाल ल्याई त्रिभुवन अन्तर्राष्ट्रिय विमानस्थलमा केन्द्रीय अनुसन्धन ब्यूरो सिआइबीलाई बुझाइएको छ।
सिआइबीले घट्नाबारेमा थप अनुसन्धान गरिरहेको र आफन्त नआएसम्मका लागि उद्धार गरिएका महिलालाई नख्खुस्थित 'फर द वान' संस्थाको जिम्मामा पठाएको सिआइबीका डीएसपी राजकुमार सिलवालले बताए।हाल उद्धार गरिएका महिला उक्त संस्थाको सुरक्षित आवासमा रहेको संस्थाका कार्यक्रम संयोजक मीना विकले जानकारी दिइन्। रासस