काठमाडौँ : इजरायलका लागि नवनियुक्त नेपाली राजदूत डाक्टर अञ्जान शाक्ले नेपालका सातै प्रदेशमो उच्च प्रविधिको तालिम केन्द्र खोल्न त्यहाँका राष्ट्रपतिसँग प्रस्ताव गरेकी छन् ।
जेरोसेलमा इजरायली राष्ट्रपति रिउनभेन रिभलीनसमक्ष बिहीबार ओहोदाको प्रमाणपत्र पेश गर्ने क्रममा राजदूत शाक्यले उच्च प्रविधियुक्त तालिम केन्द्र खोल्न प्रस्ताव गरेकी हुन् ।
इजरायली उच्च प्रविधिको तालिम केन्द्र नेपालमा खोलेर त्यसमार्फत् कृषि, सूचना प्रविधि, कम्युटर, मेडिकल र शिक्षका उच्च प्रविधि हस्तान्तरण गरी रोजगारी बढाउन सकिने राजदूत शाक्यले प्रस्ताव गरेकी हुन् ।
ओहोदाको पत्र हस्तान्तरण कार्यक्रममा राष्ट्रपति रिभलीनको उपस्थितिमा राजदूत शाक्यलाई ‘गार्ड अफ अनर’ सहितको सम्मान दिइएको थियो । त्यसक्रममा इजरायलका राष्ट्रपति र राजदूत शाक्यबीच आधा घण्टा भन्दा बढी वार्ता भएको थियो ।
राजदूत शाक्यले राष्ट्रपतिसँगको भेटमा आपसी हितका विषयमा छलफल भएको जानकारी दिइन् । भेटका क्रममा आफूले नेपालमा लगानी गर्न आग्रह गरेको बताउँदै शाक्यले राष्ट्रपतिले त्यसलाई सकारात्मक रुपमा लिएको पनि उल्लेख गरिन् ।
‘इजरायली लगानीकर्ता नेपालमा लगानी गर्न इच्छुक भएको पाएँ’, राजदूत शाक्यले भनिन्, ‘राष्ट्रपतिसँगको भेटमा यो विषयमा कुराकानी भयो । राष्ट्रपतिले त्यसलाई सकारात्मक रुपमा लिनुभयो ।’
राजदूत शाक्यले राष्ट्रपतिसँग सन् २०१९ मार्च महिनामा नेपालमा लगानी सम्मेलन हुन लागेको जानकारी गराउँदै इजरायली लगानीकर्तालाई नेपालमा लगानीको प्रस्ताव गरेको बताइन् । शाक्यले आधा दर्जन भन्दा बढी लगानीकर्ताले लगानीका लागि प्रतिवद्धता जनाएको पनि बताइन् ।
त्यसैगरी भेटमा राष्ट्रपति रिभलीनले नेपालका राष्ट्रपति र प्रधानमन्त्रीलाई इजरायलको भ्रमणको निम्तो दिएका थिए । राष्ट्रपति रिभलीनको प्रस्तावलाई सकारात्मक रुपमा लिँदै राजदूत शाक्यले पनि इजरायलका राष्ट्रपति र प्रधानमन्त्रीलाई नेपाल भ्रमणको निम्ता दिएकी थिइन् । उनले अप्रिल ९ मा निर्वाचन सकिएपछि आउने नयाँ सरकारले यो प्रक्रिया अघि बढाउने प्रतिवद्धता व्यक्त गरेका थिए ।
प्रतिक्रिया दिनुहोस !
