हेटौँडा : मकवानपुर प्रहरीले एक सय केजी गाँजा सहित पक्राउ परेका एक व्यक्तिलाई मंगलबार सार्वजनिक गरेको छ ।
पश्चिमी मकवानपुरको राक्सिराङ गाउँपालिका–४ बस्ने ४० वर्षीय भीमबहादुर ब्लोनलाई उनकै घरबाट एक सय केजी गाँजा सहित पक्राउ गरिएको मकवानपुर प्रहरी प्रमुख एसपी मुकेश सिंहले बताए ।
घरबाटै बिक्रीको तयारी गरिरहेको सूचनाको आधारमा ब्लोनलाई सोमबार पक्राउ गरिएको उनले जानकारी दिए । पाँचवटा ठूलो र दुईवटा सानो प्लास्टिकको बोरामा लुकाइराखेको अवस्थामा गाँजा बरामद गरिएको प्रहरीले जनाएको छ ।
पक्राउ परेका ब्लोनलाई लागुऔषध नियन्त्रण ऐन, २०३३ बमोजिम अदालतबाट म्याद थप गरी अनुसन्धान भइरहेको एसपी सिंहले जानकारी दिए ।
प्रतिक्रिया दिनुहोस !
