बिर्तामोड : चौथो झापा गोल्डकप फुटबल प्रतियोगिताको उपाधिका लागि सोमबार आयोजक झापा–११ र विभागीय टोली त्रिभुवन आर्मी क्लब भिड्दै छन् । दुवै टोलीले उपाधि उचाल्न आफूहरू आतुर रहेको दाबी गरेका छन् । झापा गोल्डकपको फाइनलमा झापा र आर्मीको यो तेस्रो भेट हो । आर्मीले झापालाई नै हराउँदै पहिलो र तेस्रो संस्करणको उपाधि चुमेको थियो ।
यसअघि तीन पटक फाइनलमा पुगेर पनि झापा हालसम्म उपाधि जित्न सकेको छैन । झापाको यो चौथो फाइनल यात्रा हो । बिर्तामोडस्थित डोमालाल राजवंशी रंगशालामा आइतबार आयोजित पत्रकार सम्मेलनमा दुवै टोलीका प्रशिक्षकले उपाधिका जित्न आफूहरू तयार रहेको प्रतिक्रिया दिए । झापा– ११ का प्रशिक्षक प्रवेश कटुवालले आफ्नो टोली यस पटक जसरी पनि उपाधि उचाल्ने दाउमा रहेको बताए । झापाका कप्तान कर्ण लिम्बूले यसपटक उपाधि जितेर यही गोल्डकपको फाइनलमा दुई पटक आर्मीसँग भोगेको हारको बदला लिने बताए ।
आर्मीका प्रशिक्षक चुनबहादुर थापाले आफ्नो सेटका केही खेलाडी नभएकाले खेलमा केही असर गरे पनि टिमले उपाधि उचाल्नेमा कुनै शंका नरहेको प्रतिक्रिया दिए । आर्मीका कप्तान भरत खवासले झापा– ११ राम्रो टिम भएकाले उपाधिका लागि कडा प्रतिस्पर्धा गर्नुपर्ने तर, उपाधि भने आफ्नै टोलीले जितेर ह्याट्रिक पूरा गर्ने योजना रहेको बताए ।
दर्शकको भरपुर समर्थन पाउँदै आएको झापा तीन विदेशी खेलाडी र आफ्ना नियमित स्ट्राइकर कर्ण लिम्बू, डिफेन्डर देवेन्द्र तामाङ, दिलेन लोक्तामसहित मैदान उत्रने तयारीमा छ । आर्मी पनि आफ्ना नियमित फरवार्ड नवयुग श्रेष्ठ, भरत खवास र गोलरक्षक विकेश कुथुसहितका मैदान ओर्लंदै छ । प्रतियोगिताको विजेताले १२ लाख ५५ हजार र उपविजेताले ६ लाख पाँच हजार रुपैयाँ पुरस्कार पाउनेछन् ।
प्रतिक्रिया दिनुहोस !
