अमेरिका : नेकपा अध्यक्ष पुष्पकमल दाहाल प्रचण्ड पत्नी सीता दाहालको मंगलबार अमेरिकाको जोन हप्किन्स अस्पतालमा चेकजाँज गरिएको छ । बंशानुगत पार्किन्सन रोगबाट ग्रसित सीतालाई चेकजाँच गरिएको र चिकित्सकको सल्लाह बमोजिम अन्य प्रकृया सुरु गरिने पारिवारिक श्रोतले जानकारी दिएको छ ।
सीतालाई अस्पताल भर्ना नगरिएको र मंगलबारको रिर्पोटपछि अन्य उपचार गरिने जनाइएको छ । सीता सुगर र उच्च रक्तचापबाटसमेत ग्रसित छिन् । पत्नी सीताको उपचारका लागि प्रचण्डले यस अगाडी सिंगापुर लगेका थिए । छोरा प्रकाश दाहालको अचानक मृत्यु भएपछि सीता थप बिरामी परेकी हुन् ।
सीताको उपचारको सबै समन्वय वासिङटन डिसीस्थित नेपाली राजदूतावासले गरेको छ । नेकपा अध्यक्ष दाहाल, पत्नी सीता, छोरी गंगा र नर्स अम्बिका पुडासैनीका साथ सोमबार अमेरिकाको वासिङटन डिसी आइपुगेका थिए ।
तत्कालीन विद्रोही माओवादीका नेता प्रचण्डविरुद्ध कुनैपनि गतिविधि नहोस भनेर अमेरिकी सरकारलनो इन्भेष्टिगेशन सर्कुलर जारी गरेको छ । यसको अर्थ उनकाविरुद्धमा कुनै पनि उजुरी हुनेछैन्। अमेरिकी सरकारले यस प्रकारको सर्कुलर यसअगाडी भारतीय नेताहरु सोयिना गान्धी र नरेन्द्र मोदीको भ्रमणका बेला जारी गरेको थियो ।
नेकपा अध्यक्ष प्रचण्डको यो तेश्रो अमेरिका भ्रमण हो । यसअघि सन् २०११ र सन् २००८ मा नेकपा अध्यक्ष दाहाल अमेरिका आइसकेका थिए । सन् २०१२ को सेप्टेम्बर ६ मा अमेरिकी सरकारले प्रचण्ड नेतृत्वको माओवादीलाई आतंककारी सूचीबाट हटाएको हो ।
नेकपा अध्यक्ष दाहालले यस पटकको भ्रमणमा कुनै पनि राजनीतिक भेटघाट तथा छलफल गर्ने छैनन् । उनको भ्रमण नितान्त पत्नी सीताका उपचारमा केन्द्रित रहने जानकारी दिइएको छ ।
प्रतिक्रिया दिनुहोस !
