काठमाडौं : संघीय संसद अन्तर्गत अर्थ समितिका सांसदहरुले बजेटको पूर्वतयारीका लागि अध्ययन गर्न भन्दै देशको पूर्व–पश्चिम यात्रा गर्ने तयारी गरेका छन् ।
समितिका सभापति कृष्ण दहालको संयोजकत्वमा टोलीले घुम्ने योजना बनाएको हो । आगामी आर्थिक वर्षको बजेट कार्यक्रमलाई सघाउ पु¥याउने भन्दै देशका विभिन्न भागमा भ्रमण गर्न लागेको दाहालले बताए ।
समितिको सोमबार बसेको बैठकले विनियोजन विधेयकका सिद्धान्त र प्राथमिकता सदनमा पेश हुनुअघि नै अर्थ समितिले सात वटा प्रदेशमा पूर्व बजेट छलफल गर्ने निर्णय गरेको हो ।
नयाँ वर्षको सुरुवातकै पहिलो सातादेखि टोलीको भ्रमण सुरु हुनेछ । पूर्व बजेट छलफल र स्थलगत अवलोकन कार्यक्रम पूर्वको झापादेखि पश्चिम धनगढीसम्म पुग्ने उनीहरुको कार्य तालिकामा उल्लेख छ ।
सांसद ज्ञानेन्द्र बहादुर कार्कीको संयोजकत्वमा १२ जना सदस्य सहितको उपसमिति गठन भएको छ । प्रदेश नम्बर १ को झापा र विराटनगर, प्रदेश नम्बर २ को जनकपुर र विरगञ्ज तथा प्रदेश ३ को हेटौंडामा भ्रमण गर्नेछ ।
यस्तै सांसद सुरेन्द्र पाण्डेको संयोजकत्वमा अर्काे १२ सदस्य सहितको उपसमिति बनेको छ । उनीहरुले गण्डकी प्रदेशको पोखरा, प्रदेश नम्बर ५ को बुटवल र नेपालगञ्ज, कर्णालीको सुर्खेत तथा सूदुरपश्चिमको धनगढीमा कार्यक्रम गर्ने योजना छ ।
भ्रमणपछि दुबै उपसमितिले सुझाव सहितको प्रतिवेदन समितिमा बुझाउने छन् । सोही आधारमा समितिले सम्बन्धित निकायहरुमा निर्देशन दिने सभापति दहालले बताए । सम्बन्धित प्रदेशमा गएर स्थानीय तह र प्रदेशका पदाधिकारीहरुलाई बोलाएर अन्तक्रिया तथा छलफल गर्ने योजना बनाएको सभापति दहालले जानकारी दिए ।
कार्यतालिका अनुसार उनीहरुको भ्रमण आठ दिनसम्म हुने छ । समितिले भ्रमणका लागि दुईवटा भागमा टोली गठन गरेको हो । पहिलो टोलीले प्रदेश नम्बर १, २ र ३ मा कार्यक्रम गर्नेछ । बाँकी टोली गण्डकी प्रदेश, प्रदेश नम्बर ५, कर्णाली प्रदेश र सुदूरपश्चिम प्रदेश जानेछ ।
सांसदहरुले मुलुकका प्रमुख व्यापारिक नाका, भन्सार कार्यालय, आन्तरिक राजश्व कार्यालय तथा ठुला राष्ट्रिय गौरवका आयोजनाहरुको समेत अवलोकन गर्ने कार्यक्रम छ ।
निजगढ विमानस्थल, द्रुतमार्ग, बबई सिञ्चाई आयोजना, रानीजमरा कुलरीया सिंचाई आयोजना, पोखरा अन्तर्राष्ट्रिय विमानस्थल, गौतमबुद्ध अन्तराष्ट्रिय विमानस्थल तथा लुम्बिनी क्षेत्र विकास कोषको भ्रमण गर्ने सांसदहरुको कार्यक्रम छ ।
प्रतिक्रिया दिनुहोस !
