सिरहा : सिरहाको दुई स्थानबाट प्रहरीले लागुऔषधसहित चार जनालाई पक्राउ गरेको छ। भारतीय बजारबाट लागुऔषध खरिद गरी नेपाल ल्याउँदै गर्दा चेकजाँचको क्रममा उनीहरु पक्राउ परेका हुन् ।
लहान नगरपालिका १९ स्थित कटहा चौकमा चेकजाँच गर्ने क्रममा स ५ प २३२४ नम्बरको मोटरसाइकल चालक १९ वर्षीय दिपक सहनी र सप्तरीको सुरुङ्गा नगरपालिका ५ का ३१ वर्षीय पशुपति शर्मालाई पक्राउ गरेको छ । इलाका प्रहरी कार्यालय लहानका प्रहरी टोलीले उनीहरुको साथबाट फेनारगन २५० एम्पुल, डाइजेल्याब २५० एम्पुल र नुर्फिन २५० एम्पुल बरामद गरेका छन् ।
यसैगरी प्रहरी चौकी ठाडीको प्रहरी टोलीले सीमावर्ती भगवानपुर गाउँपालिका ४ स्थित ठाडी बसपार्कमा स २ प ५१६७ नम्बर मोटरसाइकल चेकजाँच गर्दा उदयपुरको त्रियुगा नपा २ का १९ वर्षीय आशिष चौधरी र वडा ९ का २२ वर्षीय नन्दकिशोर चौधरीलाई पक्राउ गरेको छ । प्रहरीले मोटरसाइकल चालक आशिषको साथबाट ८ पिस नाइट्रोसन ट्याब्लेट फेला पारेको छ ।
पक्राउ परेका चारै जनालाई अदालतबाट म्याद थप गरी अनुसन्धानका लागि इप्रका लहानमा राखिएको सिरहा प्रहरी प्रवक्ता तथा डिएसपी माधवराज खरेलले जानकारी गराए । पछिल्लो समय सिरहामा लागुऔषधको कारोबार फस्टाउँदै गएको छ ।
प्रतिक्रिया दिनुहोस !
