वर्षाअघि नै सक्ने भनिएको हावाहुरी पीडितको घर शिलान्याशबाट अघि बढेन

बारा : विनाशकारी हावाहुरीका कारण घरसँगै पत्नि र बुहारी गुमाएपछि शोकमा डुबेका बाराको फेटा–१ भलुहीका रामसुरत दास तत्मा छिमेकीको घर बनाउने जग सेनाले खन्न थालेपछि आफ्नो पनि घर बन्ने भयो भनेर खुसी थिए ।

तर उनको त्यो खुसी धेरै समय टिकेन । छिमेकीको जग खन्दै गरेको सेनाले काम नै छाडेर हिँडेपछि तत्मा अब आफ्नो घर बन्नेमा सशंकित हुन थालेका छन् । उनी भन्छन्, ‘अचानक काम नै बन्द भयो, सेनाहरु आउन पनि छाडेका छन्, कारण के हो थाहा छैन ।’

विनाशकारी हुरीले घरवार विहिन भएका पीडित परिवारका लागि संघीय सरकारका आठ मन्त्री र प्रदेश २ का मुख्यमन्त्रीले बैशाख २१ गते हेलिकप्टरमा आएर घर निर्माणको शिलान्याश तामझाम साथ गरेका थिए ।

मुख्यमन्त्री र मन्त्रीहरुले घरको शिलान्याश गर्दा वर्षायामअघि नै घर निर्माणको काम सकेर प्रभावित परिवारलाई हस्तान्तरण गरिदिने आश्वासन पनि दिएका थिए ।
तर शिलान्याश गरिएको झण्डै दुई साता बित्न लाग्दा पनि घर निर्माणको काम अघि बढेको छैन । भलुहीका तत्मा जस्तै हुरीले प्रभावित बाराका सयौं परिवार वर्षाअघि नै घर नबन्ने कुराले चिन्तित छन् ।

सेनाले भने हुरीमा परि चार जनाको ज्यान गुमाएका बाराको फेटा गाँउपालिका–६ पुरैनियाका इजहार मियाको घर मात्रै अहिले निर्माण कार्य गरिरहेको छ । मियाको घर बाहेक अरु प्रभावितहरुको घर निर्माणको काम भने सुरु नै हुन सकेको छैन । घर निर्माणको जिम्मा पाएको सेनाले केही घरको जग मात्रै खनेको छ ।

सेनाले जग खन्न थालेपछि स्थानीयले आफूहरुको नाम घर निर्माणको सूचीबाट हटाइएको भन्दै विवाद गरेपछि बारामा घर निर्माणको काम रोकिएको बताइएको छ ।
हुरी प्रभावितका लागि घर निर्माण गर्न गठित पुर्नस्थापना तथा घर पुर्ननिर्माण सहजीकरण र समन्वय समितिले बारा जिल्लामा एक हजार तीन सय ६२ घर निर्माण गर्ने बताएको थियो ।

त्यसमध्ये तीन सय भन्दा धेरै परिवारको नाम कटौती गरेको भन्दै विवाद उत्पन्न भएपछि निर्माण कार्य सुरु हुन नपाउँदै रोकिएको हो । बाराका निमित्त प्रमुख जिल्ला अधिकारी मुरारी कार्कीका अनुसार सुरुमा क्षतिको विवरण संकलन गर्ने क्रममा पूर्ण क्षति भएका एक हजार तीन सय ६२ घर निर्माण गर्नुपर्ने सूची सेनालाई उपलब्ध गराइएको थियो ।

गापा अध्यक्ष भन्छन् : प्रभावितहरुको नाम हटाइएपछि घर निर्माण रोकियो

फेटा गाँउपालिकाका अध्यक्ष अमिरीलाल प्रसाद कलवारले पनि फेटा गाउँपालिका प्रभावित सबै वडामा घर निर्माणको काम रोकिएको बताए । उनका अनुसार हुरीको घटनापछि गाउँपालिकाको कार्यालयले वडा नम्बर १ , ३ , ६ र ७ मा गरि कूल तीन सय ५३ घर क्षतिग्रस्त भएको विवरण जिल्ल प्रशासन कार्यालयमा बुझाएको थियो ।

पछि जिल्ल प्रशासन कार्यालयले स्थलगत अनुगमन गरि तयार पारेर संघीय सरकारलाई बुझाएको सूचीमा पूर्ण क्षतिग्रस्त घरको संख्या दुई सय ८५ मात्र थियो । शिलान्याशपछि स्थानीय प्रशासनले घर निर्माणका लागि सेनालाई उपलब्ध गराएको सूचीमा दुई सय तीन घर मात्र पूर्ण क्षतिग्रस्त भएको उल्लेख रहेको अध्यक्ष कलवार बताउँछन् ।

पछिल्लो पटक सेनालाई उपलब्ध गराइएको घर निर्माणको सूचीमा थुप्रै प्रभावितहरुको नाम उल्लेख नभएपछि आक्रोशित स्थानीय जिल्ला प्रशासन कार्यालय पुगेर प्रमुख जिल्ला अधिकारीको ध्यानाकर्षण पनि गराएका थिए ।

सैनिक अधिकृत भन्छन् : काम कहिले सुरु हुन्छ थाहा छैन

फेटा गाँउपालिकाको वडा नम्बर ६ पुरैनियामा घर निर्माणका लागि खटिएको सेनाका एक अधिकृतले पनि जग खन्ने क्रममा स्थानीयको विवादका कारण निर्माणको काम रोकिएको बताए ।

अहिले घरका भग्नावशेष पन्छाएर सरसफाई मात्र गरिरहेको उनको भनाइ छ । काम छिट्टै सुरु हुन्छ भनेर ‘माथि’बाट खबर आएको तर कहिलेदेखि सुरु हुने जानकारी नभएको उनले बताए ।