वीरगन्ज : पर्साको ठोरी नाकासँग सिमाना जोडिएको भारतको भिखनाठोरी बजारमा बिहीबार लागेको हाटबजारमा गएका पाँचजना नेपालीलाई भारतीयले कुटपिट गरेका छन् ।
भिखनाठोरीस्थित टिम्बरलाइनका केही व्याक्तिहरुले पर्साको ठोरी गाउँपालिका वडा नम्बर २ का विष्णु विष्ट, सुन्दर बस्तीका ५३ वर्षीय कमल खवास, इच्छानगरकी २१ वर्षिया सदिक्षा पन्त, १२ वर्षिया सुष्मा पन्त र परिचय खुल्न नसकेकी एक बालिकालाई भारतीय नागरिकले कुटेर घाइते बनाएका हुन् ।
भिखनाठोरीमा बिहीबार लागेको हाटबजारमा किनमेल गर्न गएका पाँचै जनालाई भारतीयले नियन्त्रणमा लिएर बाँसको भाठाले हिर्काउँदै कुटेको घाइते विष्णु विष्टले बताए । भारतीयहरुले झण्डै आधा घण्टा कब्जामा लिएर आफूहरु माथि कुटपिट गरेको विष्टले बताएका छन् ।
केही दिनअघि ठोरीमा मजदुरी गर्न आएका भारतीयहरु खेतमा हिँडेर बाली कुल्चिएपछि ठोरीका स्थानीय र उनीहरुबीच विवाद भएको थियो । त्यही विषयलाई लिएर बिहीबार उनीहरुले नेपालीहरुलाई कुटपिट गरेको माइती नेपाल ठोरीकी मिना गिरीले बताइन् ।
भारतीयहरुको कुटाइबाट घाइते भएका महिला तथा पुरुषको शरीर भरी निलडाम रहेको गिरीले जानकारी दिइन् । भिखनाठोरीमा नेपालीहरु कुटिएको खबर पाएपछि ठोरीमा रहेको सशस्त्र प्रहरी बोर्डर आउट पोष्टका सशस्त्र प्रहरी निरीक्षक अमरबहादुर बिक र इलाका प्रहरी कार्यालय ठोरीका प्रहरी निरीक्षक केदार पन्तको टोलीले भारतीय सीमा सुरक्षाबल (एसएसबी)को सहयोगमा आफूहरुको उद्धार गरेको विष्टले बताए ।
यस्तै नेपालीहरु माथि कुटपिट गर्ने भारतीय नागरिक रवि साह लगायत दुई जना व्यक्तिलाई भारतीय प्रहरीले नियन्त्रणमा लिएको सशस्त्र प्रहरी निरीक्षक बिकले जानकारी दिए ।
भिखनाठोरीमा रहेको एसएसबी क्याम्पमा दुबै तर्फका सुरक्षा अधिकारीबीच भएको सहमति अनुसार कुटपिट गर्ने व्यक्तिहरु विरुद्ध भारतको सुभद्रा थानामा बिहीबार नै किटानी जाहेरी दिने काम भएको बिकले बताए । नेपालतर्फ भारतीय नागरिकमाथि दुव्र्यवहार गर्नेलाई पनि कारवाही प्रक्रिया अघि बढाउने सहमति भएको बताइएको छ ।
प्रतिक्रिया दिनुहोस !
