वीरगन्ज : पर्साबाट ३० केजी चरेश र ५० केजी चरेशको धुलो बरामद भएको छ। पटेर्वासुगौली गाउँपालिका–५ देउरिया गाउँमा बुधबार राति छापा मार्ने क्रममा प्रहरीले उक्त परिमाणको लागूऔषध बरामद गरेको हो।
इलाका प्रहरी कार्यालय पटेर्वा सुगौलीका प्रहरी निरीक्षक आशीष अधिकारीको नेतृत्वमा खटिएको टोलीले बुधबार बिहान खानतलासी गर्ने क्रममा उक्त परिमाणको लागूऔषध बरामद गरेको हो।
चार वटा बोरामा फालिएको अवस्थामा ३८ वटा पोकामा रहेको ३० केजी तयारी चरेश र १८ वटा पोकामा रहेको ५० केजी चरेशको धुलो बरामद गरिएको प्रहरी निरीक्षक अधिकारीले बताए।
यसअघि मंगलबार पनि प्रहरीले देउरिया गाउँमै छापा मारेर करिब एक क्विन्टल चरेश र गाँजाका साथै गाँजा चरेश च्याप्ने फलामका दुईवटा औजार बरामद गरेको थियो।
गत शुक्रबार पनि दिनभर प्रहरीले देउरिया गाउँमा रहेका एक सय पाँच घरमा छापा मारेर तीन सय ८५ केजी गाजा, १९ केजी चरेश तथा गाँजा र चरेश च्याप्ने फलामका एक दर्जन औजार बरामद गरेको थियो।
देउरिया गाउँमा चरेश र गाँजा कारोबार व्यापक रुपमा भइरहेको सूचना आएपछि प्रहरीले निरन्तर खानतलासी र छापा मारेर गाँजा चरेश बरामद गरिरहेको प्रहरी निरीक्षक अधिकारीले बताए।
प्रतिक्रिया दिनुहोस !
