पानी र उब्जनीकाे संकटले बस्ती नै सार्ने तयारीमा चेपाङ गाउँ
धादिङ : खानेपानीको चरम संकट बेहोर्न बाध्य भएका दक्षिणी धादिङको ब्रुसवाङका बासिन्दाले बस्ती नै अन्यत्र सार्ने भएका छन् ।
ब्रुसवाङमा विकासका पूर्वाधार लैजान भन्दा पनि बस्ती सानु सजिलो हुने भएकाले यस्तो निर्णय लिएका हुन् । समुद्री सतहदेखि १ हजार ८ सय ४५ मिटर उचाइमा रहेको बु्रसवाङमा ३६ घर चेपाङ समुदायको बसोबास छ । जहाँ पुग्न पृथ्वीराजमार्गको मलेखु बजारदेखि १ दिनको पैदल यात्रा गर्नुपर्छ । यो आर्थिक वर्षमा गाउँभन्दा केही तलसम्म सडक पुगे पनि अहिलेसम्म गाउँमा सडक पुगेको छैन ।
गाउँमा विद्यालयको नाममा बाल विकासको एउटा कक्षा मात्रै छ । गाउँमा खानेपानीको चरम अभाव, न्युन उब्जनीका कारण दैनिक जीवनयापन नै जटिल भएपछि चेपाङहरु बसाइँ सर्ने भएका हुन् ।
पाखोबारीको उब्जनीले ३ महिना पनि खान नपुग्ने यहाँ खानेपानीको समस्याले बालबालिकाको शिक्षा, खेतीपाती र पशुपालनमा समेत ठूलो समस्या पैदा गरेको विषयमा अन्नपूर्ण पोस्ट दैनिकले पटक पटक समाचार प्रकाशन गर्दै आएको थियो ।
एक गाग्री पानी लिन ४ घण्टा उकाली ओराली गर्नुपर्ने बाध्यतामा ब्रुसवाँङबासी रहँदैआएका थिए । विभिन्न सरकारी तथा गैरसरकारी निकायले गाउँमा खानेपानी पु¥याउन प्रयत्न गरे पनि दिर्घकालिन रुपमा पानीको व्यवस्थापन गर्ने भरपर्दो स्रोत नभेटिएपछि गाउँमा पानी पु¥याउन सकिएको थिएन ।
पछिल्लो समय गाउँपालिकाका प्रतिनिधि तथा अन्य जनप्रतिनिधिहरुले पनि उनीहरुको बस्ती सार्न प्रयास गर्दैआएका छन् । रोजगारीको अवसर भएको ठाँउमा निश्चित जग्गा र घरका साथै विद्यालय, स्वास्थ्य संस्था, खानेपानी, सडक, बिजुली उपलव्ध हने ठाँउमा बस्ती सार्ने प्रयत्न भएको सांसद भूमि त्रिपाठीले बताएका छन् ।
आगामी दशैँसम्म नयाँ ठाउँमा ब्रुसवाङ गाउँ सार्ने प्रतिवद्धता त्रिपाठीको छ । उनीहरु प्रत्येक परिवारलाई २ रोपनी जग्गा सहित एउटा घर, घरघरमा पानीको धारा, शौचालय सहितको व्यवस्था गरिने गाउँपालिका अध्यक्ष पित्त बहादुर डल्लाकोटीले बताएका छन् ।