बैतडी : बैतडीमा सुदूरपश्चिम प्रदेश सरकार मातहत स्थापना भएका कार्यालयहरुको विकास खर्चको स्थिति निराशाजनक देखिन्छ ।
चालु आर्थिक वर्ष सकिन २० दिन मात्रै बाँकी रहँदा धेरैजसो कार्यालयले ५० प्रतिशत बजेट पनि खर्च गर्न सकेका छैनन् । तर कार्यालयहरुले भने ८० प्रतिशतसम्म खर्च हुने दाबी गरेका छन् ।
बजेट सक्न भ्याइनभ्याइ गरेर काम भइरहेको स्थानीयहरुको गुनासो छ । बैतडी, बझाङ र दार्चुला हेर्ने गरी बैतडीमा स्थापना भएको पूर्वाधार विकास कार्यालयले ९७ करोड ९८ लाखमध्ये २८ करोड २९ लाख मात्रै खर्च गरेको छ । यो जम्मा बजेटको २८.८७ प्रतिशत मात्रै खर्च हो । अबको २० दिनमा ६० प्रतिशत बढी खर्च हुने पूर्वाधार विकास कार्यालयले दाबी गरेको छ । ‘कतिपय बजेट हचुवाको भरमा राखिएको छ । त्यसले बजेटको आकार मात्रै ठूलो भएको हो । कार्यालय पनि ढिलो स्थापना भयो । कर्मचारीको अभावले धेरै काम गर्न सकिएको छैन । कामको स्थिति हेर्दा ६० प्रतिशत बढी विकास खर्च हुन्छ । बील मात्र उठाउन बाँकी छ,’ पूर्वाधार विकास कार्यालयका प्रमुख जगतप्रसाद जोशीले भने ।
ढिलो कार्यालय स्थापना भएकाले आर्थिक वर्षको अन्त्यतिर ६० प्रतिशत खर्चको हाराहारीमा पुग्ने उनको आशा छ । खानेपानी तथा सरसफाइ डिभिजन कार्यालय नम्बर १ बैतडीको ३१ करोड ५३ लाख बजेटमध्ये १६ करोड ७२ लाख मात्रै खर्च भएको कोष तथा लेखा नियन्त्रक कार्यालयले जनाएको छ ।
यस्तै जलश्रोत तथा सिंचाइ विकास डिभिजन कार्यालयको ३१ करोड ८३ लाख मध्ये ९ करोड ६४ लाख मात्रै खर्च भएको छ । यो कुल पूँजीगत बजेटको ३०.२८ प्रतिशत मात्रै हुन्छ । यस्तै सहरी विकास तथा भवन कार्यालयको ९ करोड ८४ लाख पूँजीगत बजेटमध्ये २ करोड ६० लाख मात्रै खर्च भएको कोष तथा लेखा नियन्त्रक कार्यालयका सूचना अधिकारी भाष्करदत्त पन्तले बताए ।
स्वास्थ्य कार्यालयको १ करोड ४० लाखमध्ये २९ लाख ७३ हजार खर्च भएको छ । कृषि ज्ञान केन्द्र बैतडीको ८३ लाख ५० हजार पूँजीगत बजेट मध्ये ३३ लाख २० हजार मात्रै खर्च भएको छ । सुख्खा फलफूल विकास केन्द्रको ५२ लाख ५० हजारमध्ये २० लाख ७७ हजार मात्रै खर्च भयो । घरेलु तथा साना उद्योग विकास समितिको ५३ लाख १० हजारमध्ये २ लाख १२ हजार मात्रै खर्च भएको छ । डिभिजन वन कार्यालयको ९६ लाख ३५ हजारमध्ये ४९ लाख ७७ हजार खर्च भएको छ । शिक्षा विकास तथा समन्वय इकाइको १ करोड ७ लाखमध्ये ४३ लाख ६० हजार खर्च भएको कोष तथा लेखा नियन्त्रक कार्यालयले जनाएको छ ।
सुरुमै अख्तियारी आएको बजेटको खर्चको स्थिति निकै निराशाजनक रहेकाले असारे विकासको प्रवृतिमा कुनै कमी नआएको स्थानीय तेजराम लोहारले बताए । उनी भन्छन्, ‘रातरात बजेट सक्न डोजर चलेका छन् । क्षमता अभिवृद्धिका नामका धमाधम कार्यक्रम भइरहेका छन् । यसले व्यवस्था फेरिएको भए पनि अवस्था फेरिएको छैन भन्ने कुरा प्रष्ट भएको छ ।’
प्रतिक्रिया दिनुहोस !
