मोटरसाइकलको ठक्करबाट पूर्वप्रधानपञ्‍चको मृत्यु

राजविराज : सप्तरीको अग्नीसाइर कृष्णसवरण गाउँपालिका-१ जण्डौलमा सोमबार राति भएको दुर्घटनामा पूर्व प्रधानपञ्च मोतीलाल चौधरीको मृत्यु भएको छ। पश्चिमबाट पूर्वतर्फ जाँदै गरेको को.३४प ८३३७ नम्बरको मोटरसाइकलको ठक्करले साविक जण्डौल गाविसका पूर्व प्रधानपञ्च ७२ वर्षीय मोतीलाल चौधरीको मृत्यु भएको अग्नीसाइर कृष्णसवरण गाउँपालिका-१ का वडाध्यक्ष सुशिल चौधरीले बताए।

पूर्वप्रधानपञ्च चौधरी महुली बजारको हटियाबाट साइकलमा गाउँ फर्कदै थिए। मोटरसाइकलको ठक्करले पूर्व प्रधानपञ्च चौधरीका साथै सडकमा हिँडिरहेको एउटा गाई समेत ठहरै भएको वडाध्यक्ष चौधरीले बताए।
 

चौधरीको शवको मंगलबार राजविराजस्थित गजेन्द्रनारायण सिंह अस्पतालमा पोष्टमार्टम गरिएको छ। सुनसरीको इनरुवा नगरपालिका २ घर भएका मोटरसाइकल चालक रोशन थापालाई इलाका प्रहरी कार्यालय कञ्चनरुपले नियन्त्रणमा लिएको डिएसपी मकेन्द्रकुमार मिश्रले बताएका छन्।