राजविराज : सप्तरीको खडग नगरपालिका ४ करमनीयामा भएको दुर्घटनामा एक महिलाको मृत्यु भएको छ भने चारजना घाइते भएका छन् । भारतीय सुमोको ठक्करले इलाम जाँदै गरेको मारुती भ्यानमा सवार एक महिलाको मृत्यु भएको प्रहरीले बताएको छ।
राजविराजबाट जनकपुर जाँदै गरेको जेएच १५ जे ३२०३ नम्बरको सुमोले काठमाडौंबाट इलामतर्फ जाँदै गरेको को १ च ४२२८ नम्बरको मारुती भ्यानलाई पूर्व–पश्चिम राजमार्गमा ठक्कर दिंदा मारुतीमा सवार इलाम नगरपालिका १ की ५८ वर्षीया टंकमाया लिम्बुको मृत्यु भएको प्रहरीले बताएको छ ।
मारुती भ्यानका चालक टंकमायाका छोरा सबिन लिम्बु र छोरी संगीता लिम्बु घाइते भएका छन् । यसैगरी सुमो गाडीमा सवार तिलाठी कोइलाडी गाउँपालिका ७ स्थायी घर भएका राजविराज ५ बस्ने जितेन्द्रप्रसाद साह उनका ज्वाई जनकपुर १ का आशुतोष साह घाइते भएका छन् । आशुतोषकी श्रीमती सोनी सकुशल छिन् ।
दुर्घटनाग्रस्त दुवै गाडीलाई इलाका प्रहरी कार्यालय कडरबोनाले नियन्त्रणमा लिएको इन्स्पेक्टर रामराजा केशरीले बताए । सुमो गाडीका चालक फरार भएका छन् । प्रहरीले सुमोमा सवार जितेन्द्रलाई समेत नियन्त्रणमा राखेको छ ।
महिलाको शवलाई सप्तऋषी अस्पताल लहानमा पोष्टमार्टम लागि राखिएको प्रहरीले बताएको छ ।
प्रतिक्रिया दिनुहोस !
