बेनी : म्याग्दीको रघुगंगा गाउँपालिका-३ बरखर्कमा मंगलबार दिउँसो बोलेरो जिप दुर्घटना हुँदा जलविद्युत आयोजनाका इञ्जिनियरसहित चार जना घाइते भएका छन्।
राहुघाट जलविद्युत आयोजनाको अडिट नम्बर २ को सुरुङबाट क्याम्पतर्फ जाँदै गरेको ग ३ च २२७ नम्बरको जिप दुर्घटना भएको हो। मंगला गाउँपालिका-५ अर्मनका ओमबहादुर पुन र सर्वेयर बुद्धिसागर न्यौपानेलाई थप उपचारका लागि एयर डाइनेस्टिको हेलिकप्टरमार्फत् काठमाडौं लगिएको बेनी अस्पतालका सूचना अधिकारी प्रकाश सुवेदीले जानकारी दिए।
उनका अनुसार सिभिल इन्जिनियर विसन घिसिङ र शैलेस शाक्यलाई पनि काठमाडौंको मेडिसिटी अस्पताल रिफर गर्ने तयारी भएको छ। आयोजनाले भाडामा लिएको जिप सडकबाट करिब ३ सय मिटर तल खसेको थियो। दुर्घटनाको बारेमा अनुसन्धान भइरहेको प्रहरीले जनाएको छ। घाइतेको स्थानीयबासी, जनप्रतिनिधि, कर्मचारी र प्रहरीले उद्धार गरका थिए।
नेपाल विद्युत प्राधिकरणको सहायक कम्पनी रघुगंगा हाइड्रो लिमिटेडले ४० मेगावाट क्षमताको राहुघाट जलविद्युत आयोजना निर्माण गरिरहेको छ।
प्रतिक्रिया दिनुहोस !
