बुटवल : नेपालीको महान् चाड दसैं घर आँगनमा आइसकेको छ। चाडवाडमा खानपान, लत्ताकपडासँगै मनोरञ्जन पनि उत्तिकै महत्वपूर्ण हुन्छ । दसैंमा मनोरञ्जन भनेकै पीङ हो । तर पछिल्ला वर्षमा पीङ खेल्न बिरलै पाइन्छ।
लठ्ठे पिङ र चर्खे पिङ बनाउनेक्रम विस्तारै हट्दै गएको छ । पहाडी जिल्लामा चर्खे पिङ बनाउने खुबै प्रचलन थियो । तर अहिले ती भेट्याउनै मुस्किल पर्छ । गाउँमा युवा जनशक्ति कम भएका कारण दसैंमा पिङको चहलपहल विस्तारै हराउँदै गएको छ ।
खर बाटेर बनाइएको पिङ भने तराई र पहाडमा अझै पनि भेटिन्छन् । तर पहिले जत्तिकै गाउँपिच्छे हुँदैनन् । पाल्पाका संस्कृति सम्बन्धी जानकार झपेन्द्र जिसीले चर्खे पिङ लोप नै हुने अवस्थामा पुगेको बताउँछन् । 'युवाहरु गाउँमा छैनन, काठको पनि अभाव छ, उनले भने, 'विस्तारै पिङ संस्कृति हराउँदै गएको छ।' पाल्पाका एकाध गाउँमा मात्रै चर्खे पिङ राख्ने गरिइएको उनले बताए ।
तराईका जिल्ला पहाडीयाको बसोबास भएको क्षेत्रमा लठ्ठे पिङ बनाउने गरिएको छ । रुपन्देही, कपिलवस्तु, नवलपरासीका उत्तरी क्षेत्रमा यस्ता पिङहरु भेटिन्छन् । बुटवल उपमहानगरका भिनिन्न टोलमा लठ्ठे पिङहरु राखिएका छन् ।
प्रतिक्रिया दिनुहोस !
