रुकुम : रुकुमपश्चिमको चौरजहारी नगरपालिका–१२ का सुन्दर शर्मा उमेरले २८ वर्षका भए । तर उनी पढाइसँगै राजनीति र व्यवसायलाई समेत एकैसाथ अघि बढाउन सफल छन् ।
शर्माले स्थानीय पाँच युवाको सहयोगमा गाउँमा खेर गइरहेको सिस्नो प्रशोधन गरेर पाउडर उत्पादन गर्न थालेका छन् । हिमालयन बहुसेवा प्रालि दर्ता गरेर शर्मासँगै तिनले जिल्लामा पहिलोपटक सिस्नोको पाउडर उत्पादन गर्न थालेका हुन् । जिल्ला सदरमुकाम मुसिकोट नगरपालिका–५ सेरीगाउँमा उनीहरूले उद्योग स्थापना गरेका छन् । यहाँका घरबारीदेखि जंगलमा प्रशस्त पाइने सिस्नो टिपेर उद्योग प्रशोधन गरी पाउडर बनाउँदै आएका छन् ।
सिस्नोको पाउडर उत्पादन गरेर बजारमा बिक्री गर्न सुरु गरेको उद्योग सञ्चालक तथा व्यवसायी युवा सुन्दर शर्माले बताए । उनका अनुसार उद्योग सञ्चालन भएको १५ दिनभित्रै सिस्नोको ६५ किलो पाउडर उत्पादन गरिएको छ । सिस्नोको पाउडर प्रतिकिलो पाँच सय ५० रुपैयाँका दरले बिक्री भइरहेको छ । यहाँ उत्पादन भएको सिस्नो पाउडरको काठमाडौं, नेपालगन्ज, सुर्खेतलगायत ठूला होटल, गेष्ट हाउस तथा व्यापारीबाट माग बढेको छ ।
जंगलमा खेर गइरहेको सिस्नो प्रशोधन गरी पाउडर उत्पादन गर्दा बेरोजगार युवाले समेत रोजगारी पाएका छन् । बेरोजगार युवालाई आर्थिक विकासमा लगाउन गाउँमै स्वरोजगारमूलक अवसरको सिर्जना गर्न सकिन्छ भन्ने सिस्नो प्रशोधनमा खटिएका युवाले उदाहरण दिएका छन् । ‘राजनीतिलाई पेशाको रूपमा लिने चलनकोे अन्त्य गर्न यस्तो पेशा अपनाएको हुँ’, उद्योग सञ्चालक शर्माले भने, ‘विद्यार्थी राजनीति र यस पेशामार्फत नागरिकलाई सचेतना फैलाउने छौं ।’
गाउँमै रोजगारी सिर्जना गर्न स्थानीय सरकारले साना तथा मझौला उद्योग स्थापनामा लगानी गर्नुपर्ने उनले बताए । जिल्लाको स्यालापाखा, भलाक्चा, छिवाङ, मुसिकोट, रातामाटा लगायतका ठाउँबाट उद्योगका लागि सिस्नो आयात हुन थालेको छ । पाँचजना युवाको सामूहिक रूपमा व्यक्तिगत २१ लाखको लगानीले उद्योग सञ्चालन भएको हो । यसअघि जिल्लामा सिस्नोको कच्चा पदार्थ प्रशस्तै रहे पनि त्यसको सदुपयोग हुन सकेको थिएन ।
प्रतिक्रिया दिनुहोस !
