उदयपुर : उदयपुरको त्रियुगा नगरपालिका १६ आहाले रातापानीमा आगलागी हुँदा ४ वर्षीय बालकको मृत्यु भएको छ।आगलागीबाट छिमेकी २ वटा घर जलेर नष्ट भएका छन्। बिहीबार स्थानीय चन्द्रबहादुर राईको घरमा आगो सल्किदा राईका ४ वर्षीय छोरा बिष्णुबहादुर राईको ज्यान गएको हो । आगलागीबाट छिमेकी वमबहादुर राईको घर समेत पूर्णरुपले जलेर नष्ट भएको जिल्ला प्रहरी कार्यालयका डीएसपी हरिकृष्ण केसीले जानकारी दिए।
घरमा कोही नभएको समयमा बालक बिष्णुले लाइटर खेलाउने क्रममा आगो सल्किएको स्थानीयलाई उदृत गर्दै डीएसपी केसीले बताए । आगलागीबाट राई द्वयका दुई तले घर, लत्ताकपडा, खाद्यान्न, भाँडावर्तन नष्ट भएका छन्। दुईवटा सगुर, ग्वाली गरी ३२ लाख बराबरको धनमाल क्षति भएको प्रहरीको अनुमान छ।
आगो स्थानीय र प्रहरी चौकी शुकौराबाट खटिएको टोलीले १ घण्टापछि नियन्त्रणमा लिएको थियो । यसैबीच बुधबार बेलका नगरपालिका ५ कुम्वे डाँडाका नयन्द्रबहादुर श्रेष्ठको घरमा सोलार प्यानलबाट लाइन सर्ट भई आगलागी हुँदा १५ लाख बराबरको क्षति भएको प्रहरीले जनाएको छ।
प्रतिक्रिया दिनुहोस !
