डोल्पा : भीषण आगलागी भएको छ। ठुलीभेरी नगरपालिका ६ मा पर्ने काँडाताली गाउँमा भीषण आगलागीबाट भएको हो। काँडाताली गाउँ नजिकै धुपीरुख भन्ने जंगलमा लागेको आगो सल्किदै काँडाताली गाउँमा पस्न लाग्दा स्थानीयले थाहा पाएका थिए ।
सिँगो गाउँमा आगो पस्न थालेपछि स्थानीयले छिमेकीलाई बोलाएर आगो नियन्त्रणमा लिएको स्थानीय मेरबहादुर बुढाले जानकारी दिए । सोमबार बिहान ७ बजेतिर लागेको आगोले धुपीरुख भन्ने जङ्गल पूरै खरानी भएको छ । त्यसैगरी स्थानीयले हिउँदमा गाईवस्तुका लागि संकलन गरेर रुखमा राखेको हजारौ भारी घाँस समेत जलेर नष्ट भएको स्थानीय मेरबहादुर बुढाले बताए ।
'खाना पकाउन लागेको थिए, एक्कासी आगोको मुस्लो देखियो । आत्तिएर कराए । गाउँका सबैलाई जानकारी दिए। बिहान सबै घरमा भएकाले गाउँ जोगियो नत्र गाउँ नै खरानी हुने थियो,' बुढाले भने ।
नजिकैका थरगाउ दुरगाउँ र काँडाताली समेतका तीन गाउँका मानिसको निरन्तर प्रयासपछि दिउँसो करिब २ बजेतिर मात्र आगो नियन्त्रणमा आएको बुढाले जानकारी दिए । कसले किन आगो लगायो भन्ने केही जानकारी नभएपनि बिहान जंगलमा गएकाले लगाएको हुनसक्ने अनुमान गरिएको छ ।
'माथि गाउँ र तल घनाजंगलमा लागेको आगोले सिँगो काँडाताली गाउँ नै सखाप पार्छकी भन्ने डर थियो तर गाउँलेको अथक प्रयासले नियन्त्रणमा आयो । मानवीय तथा पशुचौपायको क्षति हुन पाएन,' थरगाउँका सुवर्ण बुढाले बताए ।
आगलागीबाट थर गाउँ र काँडाताली गाउँको झण्डै ५ लाख भन्दा बढी क्षति भएका हुनसक्ने अनुमान स्थानीयले गरेका छन्। घाँसपात र स्याउ ओखरलगायतका बिरुवा समेत नष्ट भएका छन्।
प्रतिक्रिया दिनुहोस !
