प्रकाश उपाधयाय /जुम्ला : स्वास्थ्य बिमाको सुविधाअन्तर्गत अस्पतालले औषधि नदिएको भन्दै उच्च अदालत सुर्खेतको जुम्ला इजलासमा रिट परेको छ । अधिवक्ता अनिता तिमिल्सिनाले बिहीबार रिट दर्ता गरेकी हुन् ।
स्वास्थ्य बिमा बोर्ड, जिल्ला प्रशासन कार्यालय जुम्ला र कर्णाली स्वास्थ्य विज्ञान प्रतिष्ठानलाई विपक्षी बनाइ परमादेशको मागसहित रिट दायर भएको छ । जुम्लास्थित कर्णाली स्वास्थ्य विज्ञान प्रतिष्ठानले बिमाअन्तर्गत बिरामीलाई निःशुल्क दिनुपर्ने अधिकांश औषधि निजी फार्मेसीमा पठाउने गरेकाले रिट हाल्नुपरेको अधिवक्ता तिमिल्सिना बताइन् ।
रिटमा स्वास्थ्य बिमाअनुसारका १ हजार १ सय १८ प्रकारका औषधि बिरामीलाई उपलब्ध गराउनुपर्ने, गुणस्तरीय औषधि आपूर्तिको व्यवस्था गर्नुपर्ने, बिरामीले औषधि पाए नपाएको अनुगमन गर्नुपर्ने र अनुगमन गरे नगरेको प्रतिवेदन एक साताभित्र अदालतमा पेस गर्न माग गरिएको छ ।
अधिकांश कर्णालीबासीलाई बिमा हर्ष न विस्मात् भैरहेका बेला जुम्लाको कर्णाली स्वास्थ्य विज्ञान प्रतिष्ठानमा केही राम्रो सुविधा छ भनिए पनि निःशुल्क औषधि उपलब्ध गराउने सम्बन्धमा धेरै गुनासो आउने गरेको छ । अस्पतालको फार्मेसीमा आवश्यक औषधि न हुने र अस्पताल बाहिरका निजी औषधि पसलबाट बिरामीले चर्को मूल्यमा किन्न बाध्य भएको गुनासो सर्वसाधारणको छ ।
प्रतिष्ठानका रजिस्ट्रार विश्वराज काफ्लेका अनुसार प्रतिष्ठानले टेन्डर मागेको तर कुनै पनि कम्पनीले सबै औषधि उपलब्ध गराउन नसकेकाले समस्या आएको हो । उनले अहिले ६ सय ५६ प्रकारका औषधिको टेन्डर मागेर आपूर्ति सम्झौता हुन लागेको जानकारी दिए ।
प्रतिक्रिया दिनुहोस !
