पोखरा : पोखरा महानगरपालिका-९ की कांग्रेस सभापति उमाकुमारी ठकुरीले राजीनामा दिएकी छन् ।
उक्त वडाबाट कांग्रेसलाई कम मत आएका कारण नैतिकताका आधारमा ठकुरीले राजीनामा गरेकी हुन् । पोखरा ९ मा नेकपाका उम्मेदवारले कांग्रेसभन्दा साढे ४ सय बढी मत प्राप्त गरेका थिए । कास्की २ को प्रतिनिधिसभा सदस्य निर्वाचनमा नेकपाकी विद्या भट्टराईले कांग्रेसका खेमराज पौडेललाई ८ हजार ४ सय ३ मतले हराएकी थिइन् ।
पोखराका ११ वटा वडामा फैलिएको निर्वाचन क्षेत्रमा पोखरा ९ कांग्रेसको गढ मानिन्थ्यो । स्थानीय तह निर्वाचनमा पनि त्यहाँ कांग्रेसले जितेको थियो । यसपालिको उपनिर्वाचनमा कांग्रेस उम्मेदवारलाई १ हजार १ सय ३७ आउँदा नेकपाको भागमा १ हजार ५ सय ७ मत परेको थियो ।
ठकुरीले नेपाली कांग्रेस, कास्की क्षेत्र नं. २ उपनिर्वाचन परिचालन समिति संयोजक वीरेन्द्रनारायण बिजुक्छे समक्ष राजीनामा बुझाएकी हुन् । 'जुन भरोसा र विश्वासका साथ पोखरा-९ का क्रियाशील सदस्य, नेता, मेरा अग्रजले विश्वास गरेर वडा सभापतिको जिम्मेवारी प्रदान गर्नुभएको थियो । मलाई लाग्छ पछिल्लो विषम परिस्थितिमा समय परिस्थिति अनुरुप उत्रिन सकिन कि !', उनले राजीनामा पत्रमा उल्लेख गरेकी छन् ।
उनले पोखरा-९ मा साख बचाउन नसकेकोमा कहिँकतै आफू पनि जिम्मेवार रहेको महसुश गरेको भन्दै आत्मालोचना गरेकी छन् । उपनिर्वाचनमा पार्टी संरचना, काम गर्ने तौरतरिका र वर्तमान अवस्थामा वडा तहदेखि संगठनको अवस्था मजबुत नभएको ठकुरीले उल्लेख गरेकी छन् ।
यस्तो छ राजीनामापत्र
प्रतिक्रिया दिनुहोस !
