राजविराज : पात झार्ने क्रममा आफ्नै खुट्टामा खुकुरी लागेपछि रुखबाट लडेका एक युवकको मृत्यु भएको छ। खोटाङको बारापोखरी गाउँपालिका ६ घर भई सप्तरीको सप्तकोशी नगरपालिकामा बस्दै आएका ४० वर्षीय शुक्र राईको आइतबार मृत्यु भएको सप्तरी प्रहरीले जनाएको छ ।
बाख्राका लागि घाँसपात लिन गंगाजलीस्थित जंगल गएका राई पात झार्ने क्रममा सालको अग्लो रुख चढेका थिए । अग्लो रुखमा चढेर खुकुरीले पात झार्ने क्रममा आफ्नै बायाँ खुट्टामा खुकुरी लागेर रक्ताम्य भएपछि उनी लडेर ढुंगामा बजारिदा मृत्यु भएको प्रहरी चौकी फत्तेपुर, सप्तरीले जनाएको छ ।
राई विगत १२ वर्षदेखि सप्तकोशी नगरपालिका ५ गंगाजलीस्थित बोधबहादुर खड्काको घरमा काम गरी बसेका थिए । खुकुरीले बाँया खुट्टा काटिएको र सोही क्रममा रूखबाट लडेर राईको मृत्यु भएको जिल्ला प्रहरी कार्यालय सप्तरीका डिएसपी तिलक भारतीले बताए ।
गजेन्द्रनारायण सिंह अस्पताल राजविराजमा आइतबार राईको शवको पोष्टमार्टम भइरहेको छ । शव बुझ्न खोटाङ्ग र धरानदेखि उनका आफन्त अस्पताल आइ पुगेका छन्।
प्रतिक्रिया दिनुहोस !
