रुकुम : वडाध्यक्षले प्रमुख प्रशासकीय अधिकृतमाथि आक्रमण गरेको विरोधमा रुकुम पश्चिमको आठबिसकोट नगरपालिकाको कामकाज पाँच दिनदेखि ठप्प छ । गत बिहीबारदेखि नगरपालिकामा कुनै काम भएको छैन । प्रमुख प्रशासकीय अधिकृत रामबहादुर केसीमाथि ३ का अध्यक्ष केशनमान विक नेतृत्वका युवाले आक्रमण गरेपछि यहाँ कार्यरत कर्मचारीहरु आन्दोलित भएका छन् । आक्रमणको विरोधमा कर्मचारीले नगरपालिकाको कामकाज ठप्प पारेका छन् ।
कर्मचारीको सुरक्षाप्रति नगर कार्यपालिका गम्भीर हुनुपर्ने भन्दै उनीहरुले गत बिहीबारदेखि नगरपालिकाको कामकाज गर्न छाडेका हुन् । गत बुधबार बेलुकी प्रमुख प्रशासकीय अधिकृत केसी र सूचना प्रविधि अधिकृत गणेश चन्दमाथि आक्रमण भएको थियो ।
आक्रमणबाट प्रमुख प्रशासकीय अधिकृतको टाउकोमा पाँचवटा टाका लगाइएको छ भने सूचना प्रविधि अधिकृत चन्द सामान्य घाइते भएका थिए। कार्यालयको काम गरी निवास फर्कने क्रममा बेलुकी ६ बजे नगरपालिका ९ राडी बजारमा उनीहरुमाथि आक्रमण भएको थियो । कर्मचारीले विभिन्न आठ बुँदे माग राखेर आन्दोलन गर्दै आएका छन् । माग पूरा नभएसम्मका लागि कामकाज नगर्ने भन्दै उनीहरुले नगर कार्यपालिका समक्ष माग राखेका हुन् ।
घाइतेको किटानी जाहेरीपछि वडाध्यक्ष केशरमान विकलाई प्रहरीले पक्राउ गरी मुद्दा चलाएको छ । उनको भाइ गोपाल र अन्य युवाहरु अझै फरार छन् । घटनको विषयमा अनुसन्धान भइरहेको र फरारको खोजी गरिरहेको जिल्ला प्रहरी प्रमुख प्रहरी नायब उपरीक्षक सुमित खड्काले बताए । घाइते केसीको अहिले काठमाडौंमा उपचार भइरहेको छ ।
प्रतिक्रिया दिनुहोस !
