कालिकोट : नेत्रविक्रम चन्द विप्लव नेतृत्वको नेकपाले गाँउ-गाँउमा सरकार विरुद्ध जनमत बटुल्ने अभियान थालेको छ । नेकपा कालिकोटले पार्टीको केन्द्रीय सांस्कृतिक टोली सामना परिवार र भेरी कर्णालीको सांस्कृतिक टोली कालिकोटसँग मिलेर कार्यक्रम गरेको हो ।
अभियानमा नेकपाका जिल्ला स्तरका नेता, विभिन्न संघ संगठनका नेता तथा सांस्कृतिक टोली पनि सहभागी थिए । पार्टीको एकीकृत जनक्रान्ति जनतालाई बुझाउन र क्रान्तिका लागि जनआधार तयार गर्न आफूहरूले गाँउ केन्द्रित अभियान थालेको नेकपा कालिकोटका इन्चार्ज कर्णबहादुर भण्डारी बिराडले बताए । उनले भने, 'अहिलेको व्यवस्थाका विरुद्धमा जनाधार तयार गर्नु पार्टीको पहिलो प्राथमिकता हो । हामी त्यसैका लागि गाँउ-गाँउमा जनतासँग छलफल केन्द्रित छौँ ।'
उनले गाँउमा रहेका भ्रष्ट जनप्रतिनिधि, ठेकेदार, विकासी योजनाका उपभोक्ता समितिसमेत निसानामा रहेको बताए । नेकपाका जिल्ला सेक्रेटरी मनीलाल ऐडी रणदीपले गाँउमा लुट मचाउने स्थानीय सरकारबाट नागरिक आजित भइसकेको बताए । समृद्धिका नारा दिएर कालिकोटमा भ्रष्टाचार गर्ने र सुर्खेत नेपालगञ्जतिर घर जग्गा खरीद गर्ने जनप्रतिनिधि, ठेकेदार र उपभोक्ता समितिमा रहने व्यक्तिलाई निरन्तर जनकारबाही गर्ने चेतावनी पनि दिए ।
केही दिन अगाडि मात्र दैलेख ठाँटिकाँध गाँउपालिका अध्यक्ष धिरबहादुर शाहीलाई अपहरण गरेको विषयमा जिल्ला सेक्रेटरी ऐडीले आर्थिक अनियमितताको गुनासो पार्टीमा आएकोले सोधपुछका लागि युवा संगठनले नियन्त्रणमा लिएको बताए ।
'धिरबहादुर शाहीलाई प्रहरीले उद्धार गर्यौँ भन्यो, तर हामीले सोधपुछ गरिसकेपछि छाडेका हौँ । हाम्रो लडाईं नेपाल प्रहरी, सेना जस्ता राज्यका सुरक्षा निकायहरुसँग छैन । हाम्रो लडाईं भनेकै भ्रष्ट, सामाजिक अपराधीसँगको हो । यो लडाईं जारी राखेका छौँ ।', उनले भने, 'तर भ्रष्ट जनप्रतिनिधि, ठेकेदार, उपभोक्तालाई पार्टीले जनकारबाही गर्दा कोही बाधक बन्न आउँछ भने प्रतिकार गर्छौँ । जसबाट उत्पन्न परिणामको जिम्मेवार सरकार हुनुपर्छ । सरकारले नै हामीलाई जबरजस्त हिंसात्मक राजनीतिमा धकेल्न खोज्दैछ । सरकारले पार्टीका गतिविधिमा दमनको नीति लिएको छ । यसले राम्रो परिणाम आउँदैन।'
नेकपा निकट युवा संगठनका कर्णाली ब्यूरो इन्चार्ज सितल बिष्टले भ्रष्ट विरुद्ध युवा संगठनले निरन्तर जनकारबाही गर्ने बताए । उनले भने, 'हामी संसदीय दलाल र भ्रष्टचारीलाई छाड्दैनौँ ।'
प्रतिक्रिया दिनुहोस !
