राजविराज : आगो ताप्न बालेको घुरबाट सप्तरीको सुरूङ्गा नगरपालिकास्थित दलित बस्तीमा आगलागी भएको छ । सुरूङ्गा ४ मधुपट्टीस्थित घरमा लागेको आगो निभाउने क्रममा फतुरी रामकी श्रीमति ५० वर्षीया देबी रामको गाला पोलेर घाइते भएकी छिन् । उनको उपचार भइरहेको छ ।
आगो ताप्न बालेको घुरबाट सल्किएको आगोले बस्तीका तीन घरमा आगलागी भएको सप्तरी प्रहरीले जनाएको छ । आगलागीबाट फतुरी राम, नन्द राम, हरेराम रामको घर जलेर पूर्ण रुपमा नष्ट भएको स्थानीय गणेश रामले बताए ।
आगोलाई बारुणयन्त्र, प्रहरी र स्थानीयको सहयोगमा नियन्त्रणमा लिइएको छ । केही दिनदेखि बढेको शितलहरको चिसोबाट जोगिन न्यानो र बाक्लो कपडाको अभाव हुँदा दलित बस्तीमा घुर बालेर न्यानो पार्ने काम गरिन्छ ।
प्रतिक्रिया दिनुहोस !
