बुटवल : बाँके र बर्दियालाई प्रदेश ५ बाट टुक्र्याएर कर्णालीमा मिसाउन कुरा उठिरहेको बेला प्रदेश ५ सरकारका प्रवक्ता बैजनाथ चौधरीले ‘मिडिया खपत’का लागि भाषण नगर्न सुझाव दिएका छन् । एकाध व्यक्तिले भाषण गर्दैमा संविधान संसोधन नहुने भन्दै बाँके र बर्दिया कर्णालीमा गाभ्ने कुरा असम्भव रहेको उनले बताए ।
‘मिडिया खपतका लागि एकाध सत्ता विरोधीले यो कुरा उठाइरहेका छन्, यो जनताको माग पनि होइन, निष्कर्षमा पुग्न पनि सक्दैन', उनले भने । उनले प्रदेश टुक्र्याउने कुरा सत्ताको विरोधमा केही गतिविधि गर्न सकिन्छ कि भन्ने अभिप्रायले उठाइएको समेत बताए ।
संविधान संसोधन त्यति सहज नभएको भन्दै यो असम्भव हुने उनले उल्लेख गरे। उनले बाँके र बर्दियाका थारुहरु कुनै हालतमा कर्णालीमा गाभिन नजाने दावी गरे । ‘यो थारु र मगरहरुको बाहुल्य प्रदेश हो, उनीहरु किन अल्पमतमा पर्न कर्णालीमा जान्छन् ?', उनले प्रश्न गरे, ‘थारुहट छाडेर खसानमा किन जाने ?’
भौतिक पूर्वाधार विकास मन्त्रीसमेत रहेका प्रवक्ता चौधरीले माघ ५ गतेदेखि सुरु हुने अधिवेशनमा राजधानी र नामकरणको विषयले प्रवेश पाउने बताए । ‘यही अधिवेशनले नै राजधानी टुंगो लाउँछ', उनले भने ।
राजधानी प्रदेश ३ को नजिर अनुसार हुने उनले बताए । पार्टी केन्द्रको निर्णय र प्रदेश ३ को निर्णयसमेत कुरिएको उनले स्पष्ट पारे । बुटवल राजधानी निर्विकल्प रहेको उनको भनाइ छ ।
प्रतिक्रिया दिनुहोस !
