यसरी बच्न सकिन्छ कोरोना भाइरसबाट
भाइबहिनीहरू, तिमीहरूले आजभोलि नोवेल कोरोना भाइरसको नाम धेरै सुनेका हौला । यस भाइरसले संक्रमण सबैभन्दा बढी चीनमा फैलिएको छ । यस भाइरसको संक्रमणको पहिलो केस चीनको हुबेई प्रान्तमा देखिएको हो । यसको संक्रमणबाट चीनमा तीन सय ६१ जनाको मृत्यु भइसकेको छ । चीनबाहिर फिलिपिन्समा एक जनाको मृत्यु भएको छ । हालसम्म २६ मुलुकमा पनि यसको संक्रमण फैलिएको छ ।
विश्व स्वास्थ्य संगठन (डब्लूएचओ) का अनुसार यस रोगको संक्रमण मानवबाट मानवमा भएको पुष्टि गरिसकेको छ । यसको संक्रमण बढ्दै गएपछि गत माघ १६ गते डब्लूएचओले विश्वव्यापीरूपमा स्वास्थ्य आपत्कालीन घोषणा गरेको थियो ।
नेपालमा प्रभाव
स्वास्थ्य तथा जनसंख्या मन्त्रालयका प्रवक्ता महेन्द्रप्रसाद श्रेष्ठले चीनबाट घर फर्केका एक जना नेपाली युवामा संक्रमण भेटिएको बताए । संक्रमित ती युवाको रगत र र्यालको नमुनाको परीक्षण गरिएको थियो । अहिले ती युवा स्वस्थ नै छन् । यस भाइरसको संक्रमण पछि देखिने लक्षणहरू अन्य केही व्यक्तिमा पनि देखिएको थियो । शंकास्पद अन्य १३ जना बिरामीको राष्ट्रिय जनस्वास्थ्य प्रयोगशाला काठमाडौंमा स्वास्थ्य परीक्षण गरिएको थियो । परीक्षण पछि ती व्यक्तिहरूलाई कोरोना भाइरसको संक्रमण भएको पाइएन ।
के हो नोवल कोरोना भाइरस ?
डा. विवेककुमार लालका अनुसार, नोवल कोरोना भाइरस नयाँ प्रजातिको भाइरस हो । यस भाइरसले मानिस र पशुमा संक्रमण गर्छ । यस भाइरसले सामान्य रुघाखोकीदेखि गम्भीर प्रकारको श्वासप्रश्वासको समस्या निम्त्याउँछ ।
लक्षणहरू
कोरोेना भाइरसको संक्रमण भएको १५ दिनभित्र लक्षण देखिने डा. लाल बताउँछन् । संक्रमण भएको दुई सातापछि देखिने लक्षणहरू यस प्रकार छन् ।
· ज्वरो आउने
· श्वासप्रश्वासमा समस्या देखिने
· रुघाखोकी लाग्ने
· घाँटी/टाउको दुख्ने
कसरी जोगिने ?
रुघाखोकी लागेको तथा श्वासप्रश्वासका बिरामीको नजिक नजाने तथा हातको सरसफाइ नियमित गरेमा संक्रमणको सम्भावना कम रहन्छ ।
· नियमित रूपमा साबुनपानीले हात धुने
· खोक्दा, हाच्छ्युँ गर्दा नाक मुख छोप्ने
· संक्रमित व्यक्तिबाट टाढा बस्ने
· मास्क लगाएर हिँडडुल गर्ने
· पशुजन्य मासु तथा अन्डा राम्रोसँग पकाएर खाने
· जंगली र घरपालुवा पशुपन्छीको असुरक्षित सम्पर्कबाट टाढा राख्ने
के छ उपचार ?
नोवेल कोरोना भाइरसले गर्दा हुने रोगको लागि कुनै खास उपचार छैन । डा. लालका अनुसार, यो भाइरसले निम्त्याएका लक्षणको आधारमा उपचार गरिन्छ । यस भाइरसको विरुद्ध हालसम्म कुनै खोप बनेको छैन ।