शिक्षामन्त्रीले उपकुलपतिलाई सोधे, ‘कोरोना आयो भने विश्वविद्यालयमा कस्तो असर गर्छ ?'

काठमाडौं : कोभिड १९ (कोरोना) भाइरसको संक्रमण फैलिएमा पर्न सक्ने असरबारे शिक्षा विज्ञान तथा प्रविधि मन्त्रालयले विश्वविद्यालयका उपकुलपतिहरूसँग जानकारी लिएको छ ।

शिक्षामन्त्री गिरीराजमणि पोखरेलले बिहीबार मन्त्रालयमा विश्वविद्यालयका उपकुलपतिहरूलाई बोलाएर सम्भावित जोखिमबाट प्रभावित नहुने गरी शैक्षिक कार्यक्रम तय गर्न निर्देशन दिएका छन् । विश्वविद्यालयमा भइरहेको पढाइ, सार्वजनिक भएका परीक्षा तालिका तथा विद्यार्थीसँग प्रत्यक्ष सरोकार राख्ने क्रियाकलापबारे मन्त्रीले उपकुलपतिहरूबाट जनाकारी लिएका थिए । कोरोनाको प्रक्रोप फैलिएमा प्रभावित हुन सक्ने शैक्षिक गतिविधि र तिनका निराकरणका उपायबारेमा पनि मन्त्रीले उपकुलपतिहरूको राय मागेका थिए ।

पोखरेलका स्वकीय सचिव पुरन केसीले भने, ‘यदि कोरोना भित्रियो भने विश्वविद्यालयका कस्ता-कस्ता शैक्षिक कार्यक्रम प्रभावित हुन्छन् र यसलाई कसरी व्यवस्थापन गर्न सकिन्छ भन्ने विषयमा छलफल भएको थियो ।’ कक्षा ९ सम्मको परीक्षा चैत ५ गतेभित्रमा सम्पन्न गर्ने निर्देशन दिए पनि विश्वविद्यालयले सञ्चालन गर्ने परीक्षाका विषयमा भने सरकारले चासो नदिएको विद्यार्थीले गुनासो गरेका थिए ।

छलफलमा उपकुलपतिहरूले अहिले भएको शैक्षिक गतिविधिलाई निरन्तरता दिने र कुनै समस्या आएमा बैठक बसेर निर्णय गर्ने जानकारी शिक्षामन्त्रीलाई गराएका थिए । छलफलमा त्रिभुवन विश्वविद्यालय, नेपाल खुल्ला विश्वविद्यालय तथा विश्वविद्यालय अनुदान आयोगका अध्यक्ष लगायत उपस्थित थिए ।